Riċetta: Soppa tal-bżar aħmar (capsicum) bil-ħobż tal-polenta

Recipe Capsicum spoup and polenta bread Riċetta: Soppa tal-bżar aħmar (capsicum) bil-ħobż tal-polenta

Din is-soppa tal-bżar aħmar (capiscum) tagħmel ikla sħiħa meta servuta mal-ħobż magħmul mill-polenta u ż-żebbuġ li jikkumplimentaw lil xulxin fil-kuntrasti kemm tal-kuluri kif ukoll tat-togħmiet.

Ħin: 45 minuta

Isservi: 4 persuni

Ingredjenti:

Għas-soppa:

  • 1 mgħarfa żejt taż-żebbuġa
  • 2 basliet ħomor, imqattgħin irqiq
  • 2 sinniet tewm, misħuqin
  • 4 kg bżar aħmar ħelu (capiscum), imnaddaf u mqatta’ kbir
  • 400g polpa tat-tadam
  • 2 mgħaref ħabaq frisk, imqatta’
  • 25lt stokk tat-tiġieġ jew tal-ħaxix
  • 250ml krema doppja
  • Melħ u bżar mitħun frisk
  • 2 mgħaref kurrat selvaġġ (chives) imqatta’ rqiq

Għall-ħobż:

  • 175g polenta
  • 160g dqiq self-raising
  • Niskata melħ
  • 250ml ħalib
  • 100g butir, imdewweb
  • 1 bajda, imħabbta ħafif
  • 100g ġobon cheddar, maħkuk oħxon
  • 100g żebbug iswed mingħajr għadma, imqatta’ rqiq

Metodu:

  1. Saħħan il-forn għal temperatura ta’ 180°C.
  2. Biex tagħmel il-ħobż: ħallat id-dqiq, il-polenta u l-melħ f’bieqja kbira. Żid il-ħalib, il-butir imdewweb u l-bajda u ħawwad sakemm jitħallat kollox. Żid il-ġobon u erġa’ ħawwad sew. Aqleb it-taħlita f’landa tal-ħobż (loaf tin) midluka bil-butir u llixxa l-wiċċ. Roxx biż-żebbuġ u aħmi għal 25-30 minuta jew sakemm stikka li ddaħħal f’nofs il-ħobża toħroġ nadifa. Ħalli l-ħobża fil-landa għal 5 minuti mbagħad oħroġha fuq gradilja.
  3. Sadanittant saħħan iż-żejt f’taġen kbir fuq nar moderat. Żid il-basal u qalli għal 2 minuti, imbagħad żid it-tewm u kompli qalli għal minuta oħra. Żid ukoll il-bżar aħmar u ħawwad għal 5 minuti.
  4. Ferra’ l-polpa tat-tadam u l-istokk u ħalli kollox jiftaħ jagħli, imbagħad baxxi n-nar u tektek mingħajr ma tgħatti t-taġen, filwaqt li tħawwad kull tant ħin, għal 20 minuta jew sakemm il-bżar jirtab.
  5. Żid il-ħabaq u itħan is-soppa sakemm ikollok taħlita lixxa. Żid il-krema u melħ u bżar kemm tiggosta u erġa’ saħħan.
  6. Aqleb is-soppa fil-bwieqi u roxx bil-kurrat selvaġġ (chives) imqatta’. Servi mal-ħobż imqatta’.

 
Ippruvajt din ir-riċetta?  Kif sibtha? Għidilna billi tħalli kumment jew ir-rating hawn taħt u agħfas share.