Riċetta: Sandwich biċ-ċanga mixwija u flieli tal-patata

beef-sandwich

Ikla sempliċi li tissodisfa l-aptit ta’ ikel tal-għaġla, imma fl-istess ħin hija bnina u friska u tevitalek il-ħafna żjut u qali li nsibu f’dan it-tip ta’ ikel mixtri lest minn barra. Minflok mayonnaise tista’ tuża zalza simili b’xi togħma partikolari tal-għażla tiegħek.

 

Ingredjenti

Għal 4 persuni

  • 6 tadamiet żengulin, maqsuma min-nofs
  • 1 mgħarfa żejt taż-żebbuġa
  • 4 dwawar ċanga friska ta’ 0.5 ċm ħxuna
  • 2 mgħaref klin
  • 1 sinna tewm, imqattgħa rqiq
  • 8 dawriet ħobż tond bil-qoxra
  • 100g weraq tal-aruka tari
  • 125ml mayonnaise

 

Għall-patata

  • 600g patata kbira, imqaxxra u mqatta’ flieli ħoxnin
  • 2 mgħaref żejt taż-żebbuġa
  • Niskata melħ oħxon
  • Bżar mitħun frisk

 

  1. Saħħan il-forn għal temperatura ta’ 180°C.
  1. F’bieqja kbira ħallat flimkien il-flieli tal-patata, iż-żejt taż-żebbuġa, bżar u melħ. Stivahom ħdejn xulxin fuq tilar miksi bil-karta forn u aħmihom għal 45 minuta jew sakemm jiħmaru.
  1. Iksi tilar ieħor bil-karta forn u poġġi t-tadam wiċċu ’l isfel. Roxx fuqu nofs iż-żejt, u melħ u bżar. Aħmi għal 30 minuta sakemm it-tadam jirtab. Oħorġu mill-forn u ħallih jibred.
  2. Sadanittant ifrex il-laħam bejn żewġ biċċiet cling film u b’mazza tal-kċina jew lenbuba sabbat il-laħam sakemm jinfetaħ u jirqaq għal 0.3 ċm. Poġġi l-laħam f’bieqja flimkien mal-klin, tewm u l-kumplament taż-żejt u ħallih jimmarina għal 10 minuti.
  3. Saħħan taġen tal-grilja u ixwi l-ħobż minn kull naħa. Ixwi l-laħam minn kull naħa għall-gosti tiegħek. Aqsam il-biċċiet tal-laħam fi tnejn u ħallihom joqgħodu għal 5 minuti.
  1. Poġġi erba’ biċċiet mill-ħobż fuq il-platti u idlek b’nofs il-mayonnaise. Imbagħad poġġi l-laħam, it-tadam u l-weraq tal-aruka. Ifrex il-kumplament tal-mayonnaise fuq kollox. Għatti bl-erba’ biċċiet ħobż li jkun fadal.
  1. Servi mal-flieli tal-patata.