Riċetta: Salsa tal-mango mill-Amerika t’Isfel għal mat-tiġieġ u l-ħut

Picture taken by Wim Demortier. From freeimages.com

Din is-salsa tipika tal-Amerika t'Isfel hija ferm interessanti għax tħallat ħafna togħmiet differenti: it-togħma ħelwa tal-mango u l-bżar ħelu, it-togħma punġenti tal-basal, it-togħma daqsxejn qarsa tal-lime u t-togħma partikolari ħafna tas-cilantro, magħruf ukoll bħala coriander. Ftit hemm preparazzjonijiet tal-ikel li jolqtu kull togħma bħal din is-salsa, u meta tikkombinaha mat-tiġieġ jew il-ħut, kif tipikament tintuża, ikollok verament kapriċċ togħma tajba u oriġinali.

Isservi: 4 persuni

Ħin: 10 minuti

Ingredjenti:

  • Mango friska, neħħi l-qalb u qatta' f'kaxxi ta' madwar 1cm
  • Bżar aħmar ħelu (bell peppers, mill-kbir) mqatta' f'kubi
  • Mgħarfa bżar tal-jalapeno (jew iktar skont il-gosti) maħkuk
  • 1/3 kikkra basla ħamra mqatta' rqiqa
  • 1/2 kikkra cilantro (coriander) frisk, mqatta' żgħir
  • Mgħarfa meraq tal-lumi jew lime
  • Melħ u bżar skont il-gosti

Tħejjija:

  1. Ħallat il-mango, il-bżar aħmar ħelu, il-jalapeno, il-basal u s-cilantro ġo skutella.
  2. Itfa' l-meraq tal-lumi, u ftit bżar u melħ skont il-gosti.
  3. Ħallih joqgħod għal madwar 10 minuti qabel isservi.

Jekk trid tista' tħejji r-riċetta minn ġurnata qabel u żomm fil-friġġ.