Din ir-riċetta tirrikjedi ftit xogħol u sengħa, għalhekk ma nirrakkomandax lil min għadu ġdid fil-kċina biex jibda biha. Imma min hu mdorri jsajjar, m'hemmx għalfejn ikun kok prim biex jippruvaha u żgur ma jkunx iddiżappuntat. Tista' tibdel is-salamun u tuża kwalunkwe ħut b'laħmu sod li tippreferi. Tista' wkoll tuża nbid abjad minflok il-meraq tal-għeneb.
Ħin għall-peparazzjoni: 10 minuti, u siegħa mmarinar
Ħin għat-tisjir: 20 minuta
Ingredjenti
Għal 4 persuni
Għas-salamun:
- 2 mgħaref żejt taż-żebbuġa
- 1 sinna tewm, misħuqa
- 1 kuċċarina meraq tal-lumi
- Melħ u bżar mitħun frisk
- 4 biċċiet flett (fillet) tas-salamun, bil-ġilda
Għar-ross paella:
- 125g ross, Tilda Pure Basmati Rice
- 50g butir
- 2 xalotti (shallots – basal żgħir, frisk jew niexef)
- 1 bżaru aħmar żgħir, imqatta' rqiq
- 125g frott tal-baħar imħallat, frisk jew iffriżat bil-friża mniżżla
- 100ml meraq tal-għeneb
- 1/2 kuċċarina ħjut taż-żagħfran
- 1 mgħarfa tursin frisk, imqatta'
Għaz-zalza tal-krexxuni (watercress):
- 25g butir
- 1 xalotta (shallots – basla żgħira, friska jew niexfa)
- 100ml meraq tal-għeneb
- 150ml brodu tal-ħut, jew stokk magħmul minn dada
- 2 mgħaref krema doppja
- borża ta' 85g krexxuni (watercress), mingħajr iz-zkuk ħoxnin
Metodu
Biex tipprepara s-salamun:
- Ħallat flimkien iż-żejt taż-żebbuġa, it-tewm, il-meraq tal-lumi, il-melħ u l-bżar.
- Poġġi s-salamun f'dixx ċatt u ferra' fuqu t-taħlita taż-żejt.
- Ħalli s-salamun jimmarina għal-siegħa.
Biex tipprepara r-ross paella:
- Għalli l-ilma f'borma kbira u itfa' fiha r-ross.
- Ħalli l-ilma jerġa' jiftaħ jagħli u ħawwad sew.
- Baxxi n-nar u ħallih itektek għal 8 minuti.
Biex tagħmel iz-zalza:
- Ħoll il-butir f'taġen u qalli x-xalotta sakemm tirtab.
- Żid il-meraq tal-għeneb u l-brodu tal-ħut u tektek sakemm il-likwidu jonqos bin-nofs.
- Żid il-krema u, meta tibda tagħli, baxxi n-nar u tektek għal 4 minuti.
- Poġġi l-krexxuni f'bieqja u iksih bl-ilma jagħli; saffih u laħlaħ bl-ilma kiesaħ.
- Saffih f'passatur, ixxuttah b'sarvetta u qattagħu rqiq.
- Żid il-krexxuni maz-zalza; ara jekk hemmx bżonn iżżid melħ u bżar, u warrbu.
Biex issajjar is-salamun:
- Saħħan taġen u poġġi fih is-salamun bil-ġilda 'l isfel. Sajjar għal madwar 4 minuti sakemm il-ġilda ssir ħamranija.
- Dawwar fuq il-wiċċ l-ieħor u kompli sajjar għal 4-5 minuti oħra.
Biex tagħmel ir-ross paella:
- Ħoll il-butir f'taġen kbir, żid ix-xalotti u l-bżaru aħmar u qalli għal 2 minuti sakemm jirtabu.
- Żid il-frott tal-baħar u l-meraq tal-għeneb u ħallihom jiftħu jagħlu. Żid iż-żagħfran u, meta l-likwidu jieħu kulur safrani, żid ir-ross imsajjar u t-tursin.
- Saħħan kompletament u ara jekk għandekx bżonn iżżid melħ u bżar.
- Servi s-salamun fuq sodda tar-ross paella u biz-zalza tal-krexxuni mraxxa fil-wiċċ.