Riċetta: Roti tat-tuffieħ karamelizzati

applerings

Dawn ir-roti tat-tuffieħ karamelizzati tista’ sservihom b’diversi modi. Jistgħu ikunu d-deżerta flimkien mal-ġelat; tista’ sservihom fuq il-mejda armata bl-ikel tal-Milied, mad-dundjan u z-zalza tal-cranberries; u wkoll bħala kolazzjon mal-pancakes. Tista’ tippreparahom sigħat qabel, u anke ġurnata qabel, u ssaħanhom qabel isservihom.

 It-tuffieħ jikkaramellizza aħjar jekk it-taġen ma timliehx ħafna, għalhekk għandek taqsam il-kwantità f’darbtejn. Kemm it-tuffieħ artab u kemm dak aktar iebes huma adattati għal din ir-riċetta.

 

Ħin: 30 minuta

 

Ingredjenti

Għal 6 persuni

  • 4 tuffiħat kbar
  • Felli lumija
  • 2 mgħaref butir mingħajr melħ
  • 1 mgħarfa zokkor ismar
  • ½ kuċċarina trab tal-kannella
  • 1 kuċċarina estratt tal-vanilla
  • 2 mgħaref brandy

 

Metodu

  1. Neħħi ż-żerriegħa tat-tuffieħ billi ttaqqab in-nofs u tħalli t-tuffieħa sħiħa. Qattagħhom roti roti bi ħxuna ta’ madwar ½ċm.
  2. Dewweb nofs il-butir f’taġen kbir b’qiegħ oħxon fuq nar medju għal għoli.
  3. Meta l-butir ma jibqax itella ragħwa (stenna sa dan il-ħin għax ir-roti tat-tuffieħ iridu jinħatfu malli titfagħhom fit-taġen) żid nofs it-tuffieħ, nofs iz-zokkor u nofs it-trab tal-kannella.
  4. Aqli, u dawwar it-tuffieħ sikwit, sakemm it-tuffieħ jikkaramellizza, madwar 10-12 minuti. It-tuffieħ irid ikun artab minn ġewwa meta ddaħħal ponta ta’ sikkina. Neħħi mit-taġen u poġġi f’bieqja.
  5. Irrepeti l-istess proċess bil-kumplament tat-tufffieħ.
  6. Meta t-tieni nofs ikun lest, erġa’ itfa’ l-ewwel nofs diġà msajjar fit-taġen ukoll.
  7. Żid il-vanilla u l-brandy u ħalli fuq in-nar sakemm jinxtorob il-likwidu kollu.
  8. Poġġi t-tuffieħ fi platt u servih sħun.

 

 Ippruvajt din ir-riċetta?  Kif sibtha? Għidilna billi tħalli kumment jew ir-rating hawn taħt u agħfas share.