Riċetta: Ross bil-frott tal-baħar

Rice with seafood

F’anqas minn siegħa jkollok dan il-platt apettituż b’togħma ta’ baħar lest fuq il-mejda!

Ħin: 45 minuta

Isservi: 4 persuni

Ingredjenti:

  • 350 g ross long grain
  • 500 gramm maskli (mussles)
  • 500 g gandoffli (vongole)
  • 300 g klamari, imnaddfin u mqattgħin
  • 400 g tadam, imqaxxar, imnaddaf u mqatta’
  • Żejt taż-żebbuġa
  • Litru stokk tal-ħut
  • 4 sinniet tewm, imqaxxrin
  • Melħ u bżar mitħun frisk
  • Ponn tursin frisk, imqatta’

 

Tħejjija:

  1. Poġġi l-maskli u l-gandoffli f’kazzola b’żewġ mgħaref żejt taż-żebbuġa u żewġ sinniet tewm.Poġġihom fuq nar moderat sakemm jinfetħu, ħallihom jibirdu ftit, saffi l-likwidu li ħareġ minnhom minn passatur u warrbu għal iktar tard. Neħħi dawk li ma nfetħux, imbagħad aqla’ nofs il-kwantià mill-qoxra tagħhom u warrabhom ukoll għal iktar tard.
  2. F’taġen kbir u fond saħħan 4 mgħaref mgħaref żejt taż-żebbuġa u qalli l-klamari maż-żewġ sinniet tewm l-oħra sakemm jieħdu l-kulur. Neħħi t-tewm, żid ir-ross u ħawwad għal madwar minuta sakemm jinkesa sew. Żid it-tadam u l-meraq li tkun erfajt u kompli ħawwad sakemm jixxotta, imbagħad ibda żid ftit ftit l-istokk filwaqt li kull darba tħawwad sakemm jinxtorob. Żid ukoll ftit melħ u bżar. Kif ikun kważi sar ir-ross żid il-maskli u l-gadoffli, kemm dawk tal-qoxra kif ukoll dawk li qlajt mill-qoxra.
  3. Servi fil pront bit-tursin imferrex fil-wiċċ.

Ippruvajtha din ir-ricetta ta' ross bil-frott tal-baħar ? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.

Would you like to read this recipe in English? Let us know by commenting below and we'll have it translated for you!