Riċetta: Rombli tal-ispinaċi u l-ġbejniet

Riċetta: Rombli tal-ispinaċi u l-ġbejniet Spinach roll with cheese

Riċetta tajba u attraenti bil-kuntrast tal-kulur aħdar tal-ispinaċi mrambel mal-abjad tal-irkotta u l-ġbejniet, li tista’  servi bħala l-ewwel platt akkumpanjata ma’ insalata, jew bħala ikla ħafifa.

Ħin: 25 minuta

Isservi: 2 persuni

Ingredjenti:

  • 70g butir
  • ponn weraq tas-salvja (sage) frisk, u mgħarfa oħra mqattgħa rqiq
  • 200g irkotta
  • 100g ġbejniet friski
  • Melħ u bżar mitħun frisk
  • 250g spinaċi tal-friża, bil-friża mniżżla; jew friska, mgħollija
  • 1 basla żgħira, imqattgħa rqiq
  • 2 sinniet tewm, imqattgħin irqiq
  • 2 mgħaref ilma kiesaħ
  • 4 bajdiet
  • Ħaxix tal-insalata, biex isservi

 

Metodu:

  1. Dewweb terz mill-butir f’taġen fuq nar moderat sakemm jibda jbaqbaq. Żid il-weraq tas-salvja u aqli għal minuta. Poġġi fuq platt miksi bil-karti tal-kċina biex joqtor mill-butir żejjed.
  2. Poġġi l-irkotta u l-ġbejniet f’bieqja u ħabbat b’ħabbata tal-elettriku sakemm ikollok taħlita lixxa. Roxx bil-bżar u warrab għal aktar tard. Agħsar sew l-ispinaċi b’idejk u qattagħha rqiq kemm tista’.
  3. Dewweb nofs il-butir li fadal f’taġen li ma jwaħħalx (non-stick) fuq nar moderat. Żid il-basla u t-tewm u qalli għal 5 minuti sakemm jieħdu l-kulur. Żid l-ispinaċi u kompli ħawwad għal minuta oħra. Neħħi minn fuq in-nar u ħallih jibred għal 5 minuti.
  4. Ifqa’ l-bajd f’bieqja, żid l-ilma u ħabbat flimkien. Żid l-ispinaċi u s-salvja mqattgħa u ħabbat sew. Roxx bil-melħ u l-bżar.
  5. Dewweb il-butir li fadal f’taġen kbir fuq nar moderat sakemm jibda jbaqbaq. Żid nofs it-taħlita tal-ispinaċi u l-bajd u ifrex madwar it-taġen kollu. Kif tibda tagħqad għolli t-truf biex il-bajd maħlul jidħol taħt. Kompli sajjar għal 2-3 minuti oħra sakemm tagħqad kompletament. Poġġi l-froġa fuq platt u għattiha bil-foil sakemm tagħmel it-tieni waħda.
  6. Ifrex it-taħlita tal-irkotta u ġbejniet fuq il-frajjeġ . Irrombla kull waħda ssikkata kemm tista’ u qattagħhom roti roti.

    Ippruvajt din ir-riċetta?  Kif sibtha? Għidilna billi tħalli kumment jew ir-rating hawn taħt u agħfas share.