Riċetta: Roly poly bil-frawli

Strawberry roll cake

Fi ftit ħin u bi ftit flus tista’ tagħmel din ir-roly poly ħafifa u tajba, li żgur timpressjona meta sserviha bħala deżerta jew mat-te jew kafè.

Ħin: 35 minuta

Isservi: 6 persuni

Ingredjenti:

Għall-panedispanja:

  • 2 bajdiet
  • 75 g zokkor fin (caster sugar)
  • 75 g dqiq self-raising, mgħarbul

Għall-mili:

  • 250 g ġobon mascarpone
  • 250 g frawli frisk, imnaddaf u mqatta’
  • 2 imgħaref zokkor tal-ġelu (icing sugar), mgħarbul

Biex iżżejjen:

  • 2 imgħaref lewż imkisser, inkaljat ħafif
  • Zokkor tal-ġelu (icing sugar), biex tgħarbel

Tħejjija:

  1. Saħħan il-forn għal temperatura ta’ 200°C. Idlek tilar ta’ 25 ċm x 30 ċm u iksi l-qiegħ bil-kartaforn.
  2. Fi skutella ħabbat il-bajd, imbagħad żid iz-zokkor u ħabbat tajjeb sakemm ikollok taħlita kremuża ta’ kulur ċar. 
  3. Żid ftit ftit id-dqiq u daħħlu bil-mod fit-taħlita tal-bajd u zokkor (fold in) b’mgħarfa.
  4. Ferra’ t-taħlita fit-tilar ippreparat, illixxa l-wiċċ u aħmi għal 6-8 minuti. Taħmix il-panedispanja iżżejjed għax tibda tinqasam meta tirrumblaha.
  5. Sadanittant ipprepara l-mili:
    1. Poġġi l-frawli fi skutella u għaffġu ftit b’furketta.
    2. Żid miegħu z-zokkor tal-ġelu u ħawwad.
    3. Żid ukoll il-ġobon mascarpone u ħallat kollox sew flimkien.
  6. Roxx biċċa kartaforn kbira bi ftit zokkor u aqleb il-panedispanja fuqha, aqla’ l-karta minn mal-qiegħ tal-panedispanja u b’sikkina aqta’ barra l-erba’ truf.
  7. Ifrex it-taħlita tal-mili fuq il-panedispanja mingħajr ma tasal sat-truf. Gerbeb bil-mod u bl-għajnuna tal-karta stess min-naħa l-qasira. Poġġi r-roly poly fuq platt bit-tarf il-miftuħ in-naħa t’isfel. Ferrex il-lewż fil-wiċċ u għarbel ftit zokkor tal-ġelu.

Ippruvajtha din ir-riċetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar riċetti li jgħoġbuk.

Would you like to read this recipe in English? Let us know in the comments section below!