Għal ikla ħafifa li tista’ tipprepara fi ftit minuti dan ir-risotto huwa ideali. B’ingredjenti li jkollok fil-kċina jew li ssib tixtri faċilment tista’ toħloq dan il-platt apetituż b’togħmiet Mediterranji
Ħin totali: 40 minuta
Isservi: 4 persuni
Ingredjenti:
- 60ml żejt taż-żebbuġa ekstra verġni
- 2 kurratiet, imnaddfin u mqattgħin
- 2 sinniet tewm, misħuqin
- 100g tadam imqadded, imqatta’
- 500g ross arborio
- 100ml inbid abjad
- 2lt stokk tat-tiġieġ, sħun
- Bukkett weraq tal-ispinaċi, imqatta’
- 1 kikkra qlub tal-qaqoċċ immarinat, imqattgħin
- 150g ġobon Parmiġġan, maħkuk
- Melħ u bżar mitħun frisk
Tħejjija:
- Saħħan iż-żejt f’kazzola fuq nar moderat. Żid il-kurrat, it-tewm u t-tadam imqadded u qalli għal 2 minuti, jew sakemm il-kurrat jirtab. Żid ir-ross u ħawdu sakemm jinkesa biż-żejt.
- Għolli n-nar, ferra’ l-inbid fil-kazzola u ħallih jagħli għal 2 minuti biex jevapora. Żid kuċċarun stokk tat-tiġieġ u ħawwad sakemm jinxtorob. Kompli żid l-istokk b’dan il-mod sakemm tużah kollu. Neħħi l-kazzola minn fuq in-nar.
- Żid il-weraq tal-ispinaċi, il-qlub tal-qaqoċċ, il-Parmiġġan, u melħ u bżar kemm tiggosta, u ħawwad kollox sew flimkien. Għatti l-kazzola u ħalli r-risotto joqgħod għal 2 minuti qabel isservih.
Ippruvajt din ir-riċetta? Kif sibtha? Għidilna billi tħalli kumment jew ir-rating hawn taħt u agħfas share.
