Riċetta: Quiche tas-salamun affumikat

Smoked salmon quiche

Il-quiche ukoll hija waħda mir-riċetti li tista’ tibdel u toħloq skont il-gosti tiegħek – iżżomm il-bażi tal-għaġina u t-taħlita tal-bajd u tibdel u tikkumbina ingredjenti tal-għażla tiegħek.

Ħin: siegħa u 15-il minuta, u ħin biex tkessaħ

Isservi: 6 persuni

Ingredjenti:

  • 300 g għaġina tat-torti
  • 6 bajdiet
  • 500 ml krema doppja
  • Mgħarfa xibt (dill) frisk, imqatta’
  • 125 g salamun affumikat, imqatta’ rqiq
  • Basla, imqattgħa rqiq
  • Mgħarfa kappar, imlaħlaħ
  • Melħ u bżar mitħun frisk

 

Tħejjija:

  1. Saħħan il-forn għal temperatura ta’ 200°C.
  2. Idlek turtiera ta’ 23 ċm biż-żejt u iksiha bl-għaġina. Taqqab il-qiegħ tal-għaġina b’furketta u poġġiha fil-friġġ għal 15-il minuta. Iksih l-għaġina bil-foil u imlieha bil-fażola niexfa (bake blind). Aħmi għal 20 minuta, oħroġha mill-forn u ħalliha tibred. Baxxi t-temperatura tal-forn għal 180°C.
  3. Sadanittant, ħabbat il-bajd fi skutella, żid il-krema u kompli ħabbat. Żid ix-xibt, u bżar u melħ.
  4. Neħħi l-fażola u l-foil minn fuq l-għaġina u ferrex fuqha s-salamun, il-basla u l-kappar. Ferra’ t-taħlita tal-bajd u l-krema fuq kollox. Poġġi t-turtiera fuq tilar u aħmi għal 35-40 minuta jew sakemm tara li l-quiche  għaqdet u ħadet il-kulur.
  5. Ħalli l-quiche toqgħod fil-forn għal 10 minuti u serviha ma’ insalata.

Ippruvajtha din ir-ricetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar riċetti li jgħoġbuk.