Riċetta: Qargħa ħamra bil-ħwawar u l-frott

Forsi xbajt tagħmel dejjem l-istess erba' riċetti bil-qargħa ħamra u tixtieq tipprova xi riċetta verament mhux tas-soltu? Ipprova din ir-riċetta daqsxejn eżotika bil-qargħa ħamra, diversi tipi ta' ħwawar, ħxejjex aromatiċi u frott. 

Isservi: 4 persuni

Ingredjenti:

  • Qargħa ħamra medja bil-qoxra, neħħilha ż-żrieragħ u qattagħha f'erba' biċċiet
  • Kikkra ħalib sħiħ
  • 1/2 kikkra żejt taż-żebbuġa Carapelli
  • 2 imgħaref maple syrup
  • Ftit qxur tal-larinġ maħkuk (orange zest)
  • Il-qoxxra u l-meraq ta' lumija
  • Żrieragħ ta' rummiena friska 
  • Tewma maħkuka
  • Ponn sagħtar
  • 2 imgħaref salvja (sage) mqatta' 
  • 2 imgħaref nagħniegħ mqatta'
  • 1/2  imgħarfa ħwawar Ras el Hanout (għal riċetta biex tħallat dawn il-ħwawar inti stess ikklikklja hawn
  • 1/2 imgħarfa bżar roża midħun
  • Melħ u bżar

Tħejjija:

  1. Saħħan il-forn għal 200C. Ikkombina t-tewm, 1/4 kikkra żejt-taż-żebbuġa, is-salvja u s-sagħtar fi blender u ħawwad sakemm isiru ħaġa waħda. Żid il-maple syrup.
  2. Poġġi nofs il-qargħa ġo dixx tal-forn tal-fuħħar. Iksi l-qargħa sew sew bit-taħlita taż-żejt u l-maple syrup. Raxxax bil-bżar, melħ, Ras el Hanout u l-qxur tal-larinġ maħkuk.
  3. Għatti bil-foil u sajjar fil-forn għal madwar 35 minuta jew sakemm il-qargħa tirtab.
  4. Ikkobina l-ħalib, il-kumplament taż-żejt taż-żebbuġa, il-lumi, il-bżar roża, iż-żrieragħ tar-rummien, in-nagħniegħ, bżar u melħ skont il-gosti ġo skutella biex tagħmel qisu jogurt.
  5. Neħħi l-qargħa minn ġol-forn u qatta' f'biċċiet żgħar. Poġġi ġo dixx nadif u servi immedjatament bi ftit jogurt.