Riċetta: Qarabagħli twil mimli, imħawwar bil-kannella (cinnamon)

Riċetta: Qarabagħli twil mimli, imħawwar bil-kannella

Il-kannella nsibuh l-aktar f’riċetti tal-ħelu, imma jagħti togħma tajba wkoll lil platti oħra. Din ir-riċetta mhux tas-soltu ta’ qarabagħli mimli bl-aruka tista’ tittieħed bħala l-ewwel platt jew bħala kontorn.

Ħin: 50 minuta

Ingredjenti

Għal 4 persuni

  • 750g qarabagħli twil
  • 40 g prosciutto crudo
  • Mazz aruka
  • 4 biċċiet ħobż tal-Franċiż, imqatta’ dadi
  • Trab tal-kannella
  • 2 mgħaref ġobon Parmiġġan, maħkuk
  • 2 sinniet tewm, imqattgħin
  • Krema friska
  • Żejt taż-żebbuġa
  • Melħ u bżar mitħun frisk

Metodu

  1. Aqta’ barra z-zokk u t-tarf ta’ taħt tal-qarabagħli u aqsmu min-nofs għat-tul, imbagħad ħaffer in-nofs.
  2. Saħħan ftit żejt taż-żebbuġa f’taġen u itfa’ t-tewm. Kif jibda jsir żid l-aruka u ħawwad għal nofs minuta sakemm tibda titbiel, imbagħad żid id-dadi tal-ħobż.
  3. Kompli ħawwad għal 3 minuti, neħħi minn fuq in-nar u żid il-prosciutto u 2 mgħaref Parmiġġan.
  4. Roxx bil-melħ u l-bżar u imla l-qarabagħli.
  5. Saħħan ftit żejt taż-żebbuġa f’kazzola ċatta u aqli ftit il-qarabagħli, xarrbu b’kuċċarun ilma,u ftit krema. Ħawru b’niskata trab tal-kannella, għatti l-kazzola u ħallih itektek għal 20 minta. Servi sħun.