Meta l-qaqoċċ ikun abbundanti jorħos fil-prezz, għalhekk tajjeb li naħtfu l-okkażjoni biex nixtruh u nużawh kemm nistgħu f’riċetti differenti. Hawn se naraw kif tista' tipprepara u żżomm il-qaqoċċ biex tużah iktar tard.
Ħin: siegħa u nofs; u ħin biex tqattar u tkessaħ
Kwantità: 2-4 vażetti, skont id-daqs
Ingredjenti:
- 30 qaqoċċa żgħira, imnaddfin biex tuża l-qlub (Kif tipprepara l-qaqoċċ għal riċetti differenti)
- 500 ml ħall abjad
- 500 ml ilma
- 3 kuċċarini melħ oħxon
- 1.5 lt żejt taż-żebbuġa
- Weraq tar-rand
- Bżar sħiħ iswed
- Meraq ta’ 1½ lumija
Tħejjija:
- Imla skutella kbira bl-ilma u żid il-meraq tal-lumi
- Naddaf il-qaqoċċ sakemm jibqagħlek il-qlub, idlikhom bil-biċċiet tal-lumi magħsur, u poġġihom fl-ilma bil-meraq tal-lumi sakemm tlestihom kollha. Saffi l-qaqoċċ mill-ilma.
- F’kazzola kbira għalli l-ilma, il-ħall u l-melħ u żid il-qlub tal-qaqoċċ; għalli għal 7-8 minuti.
- Saffi l-qaqoċċ sewwa mill-ilma, imbagħad poġġih rasu ’l isfel fuq sarvetta nadifa biex joqtor u jiksaħ kompletament.
- Qassam il-qlub tal-qaqoċċ f’vażetti sterilizzati (fl-ilma jagħli jew f’forn jaħraq għal 10 minuti) mingħajr ma twassalhom sat-tarf. F’kull wieħed daħħal werqa tar-rand u ftit bżar sħiħ iswed. Imla l-vażetti sa 1 ½ ċm mix-xifer biż-żejt taż-żebbuġa biex tgħatti l-qaqoċċ kompletament. Agħfas ’l-isfel b’furketta u ċaqlaq ftit il-vażett biex toħroġ l-arja li tkun inqabdet ġewwa. Agħlaq tajjeb bl-għotjin.
- Poġġi l-vażetti f’borma li jidħlu kompletament fiha u dawwar sarvetta bejniethom biex ma jiċċaqalqux. Imla ilma biżżejjed biex tgħattihom u poġġi l-borma fuq nar għoli. Kif tiftaħ tagħli baxxi ftit in-nar u ħallihom jagħlu għal 50 minuta. Ħalli l-vażetti fl-ilma sakemm jiksħu kompletament.
Ippruvajtha din ir-ricetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.
Would you like to read this recipe in English? Let us know in the comments section below!
