Riċetta: Qalba tal-kustilja taċ-ċanga (rib eye) b’zalza tal-mustarda

Rib eye steak- kustilja taċ-ċanga

Read this in English: Recipe: Rib-eye with mustard sauce

Il-qalba tal-kustilja, jew kif inhi magħrufa aħjar, ir-rib eye, hija l-parti favorita taċ-ċanga ta’ ħafna, għax issajjarha kif issajjarha dejjem tibqa’ tarja u bnina. F’din ir-riċetta ħafifa, iz-zalza tal-mustarda tagħmel akkumpanjament perfett lil dan il-laħam.

Ħin: 30 minuta

Isservi: 4 persuni

Ingredjenti:

  • 4 biċċiet rib eye ftit ħoxnin
  • 30 g butir

Għaz-zalza:

  • 2 basliet ħodor żgħar (spring onions), imqattgħin irqiq ħafna
  • Mgħarfa mustarda wholegrain
  • 2 kuċċarini mustarda
  • 125 ml inbid abjad (dry)
  • 3 imgħaref ilma
  • Kuċċarina għasel
  • ½ kuċċarina sagħtar (thyme) imnixxef
  • 2 imgħaref krema doppja
  • 2 imgħaref ġobon cheddar, maħkuk

Tħejjija:

  1. Dewweb il-butir f’taġen fuq nar moderat u ħallih jibda jfexfex.
  2. Żid il-laħam u sajru għal 4-5 minuti fuq kull naħa, jew skont kif tiggosta l-laħam int. Poġġih fuq platt, għattih u ħallih għas-sħana.
  3. Fl-istess taġen qalli l-basal sakemm jirtab, imbagħad żid il-mustarda, il-mustarda wholegrain, l-inbid, l-ilma, l-għasel u s-sagħtar; ħawwad għal 3 minuti jew sakem iz-zalza tinġibed ftit.
  4. Żid il-krema u l-ġobon u ħawwad skemm jinħall il-ġobon.
  5. Poġġi l-biċċiet tar-rib eye fuq platti sħan u servihom biz-zalza tal-mustarda fil-wiċċ.

Ippruvajtha din ir-riċetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar riċetti li jgħoġbuk.

Ara lista ta' ħxejjex u frott skont l-istaġun