Dawn il-qagħaq iqarmċu jagħmlu riħa li taqsamlek qalbek huma u jsiru, li tħajrek tiekol minnhom hekk kif joħorġu mill-forn. Però, jekk tħallihom joqogħdu ftit toħroġ aktar it-togħma tagħhom. Tista’ tiekol minnhom mingħajr ma tinkwieta żżejjed għax minflok butir fihom żejt taż-żebbuġa u zokkor fihom ftit li xejn. Eċċellenti biex tbillhom fil-kafè!
Ħin: 45 minuta
Kwantità: 30
Ingredjenti:
- 500 g dqiq tat-tip ‘00’, mgħarbul
- Kuċċarina trab tal-ħami (baking powder)
- ½ kuċċarina bikarbonat tas-sodju (bicarbonate of soda)
- 75 g zokkor ismar
- 200 ml żejt taż-żebbuġa
- 150 ml inbid aħmar
- Meraq ta’ larinġa
- Qoxra maħkuka ta’ larinġa
- Kuċċarina trab tal-kannella (cinnamon)
- ½ kuċċarina msiemer tal-qronfol mitħuna (ground cloves)
Tħejjija:
- Saħħan il-forn għal temperatura ta’ 180°C. Iksi tilar kbir bil-kartaforn.
- Fi skutella kbira ħabbat flimkien iż-żejt taz-zebbuġa, l-inbid, il-meraq u l-qoxra tal-larinġ, iz-zokkor , it-trab tal-kannella, l-imsiemer tal-qronfol, il-bikarbonat tas-sodju u t-trab tal-ħami.
- Żid nofs id-dqiq u ibda għaqqad b’mgħarfa. Bil-mod żid il-kumplament tad-dqiq sakemm tifforma għaġina. Kompli aħdimha ftit b’idejk sakemm tillixxa u ma tibqax iddellek.
- Ifforma l-għaġina f’qagħaq, ottijiet jew għoqiedi, jew għamel ftit minn kollox, u poġġihom fuq it-tilar. Aħmi għal 30-35 minuta, jew sakemm jieħdu kulur ħamrani.
Ippruvajtha din ir-ricetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.
Would you like to read this recipe in English? Let us know in the comments section below!
