Dan il-pulpettun ta-tiġieg miksi bil-bejken huwa ideali biex tlestih minn qabel meta jkollok il-mistednin u sservih fuq ħobż mixwi bħala ikla ħafifa , jew isservih ma’ insalata jekk ikollok bżonn ta’ ikla ppreparata minn qabel għall-familja.
Ingredjenti
Għal 10 porzjonijiet
- 7 listi twal bejken, mingħajr ġilda
- 100g sultana
- 900g sidra tat-tigieġa, imqattgħa biċċiet żgħar
- 1 mgħarfa klin
- 2 mgħaref tursin imqatta’
- 2 mgħaref timu
- Qoxra maħkuka ta’ larinġa
- Qoxra maħkuka ta’ lumija
- 1 kuċċarina melħ
- 300g ikkapuljat tal-majjal
- Poġġi s-sultana f’bieqja żgħira, għattiha bl-ilma jagħli u ħalliha tixxarrab.
- Saħħan il-forn għal temperatura ta’ 200°C.
- Iksi landa għall-pulpettun (loaf tin) bl-istrixxi tal-bejken billi ttarraġ waħda fuq oħra biex ma jibqax spazji bejniethom. Ħalli t-truf jiddendlu ma’ xifer il-landa biex wara tkun tista’ tagħlaq bihom stess. Jekk jibqagħlek xi ftit bejken qattgħu u warrbu
- Poġġi 500g mit-tiġieġa fi proċessur tal-ikel u itħan. Żid il-klin, it-tursin, it-timu, il-qoxra maħkuka tal-larinġa u tal-lumija, l-ikkapuljat tal-majjal, u xi bejken li jkun fadal. Ħawwad sakemm jitkisser kollox flimkien.
- Ifrex terz ta’ din it-taħlita fuq il-bejken fil-landa. Fuqha ferrex nofs it-tiġieġa mqatta’. Agħfas ’l isfel biex dejjem ikollok l-istess għoli. Roxx terz tas-sultana. Irrepeti l-proċedura b’terz tat-taħlita tat-tiġieġ mitħun, il-kumplament tat-tiġieġ imqatta’ u terz ieħor ta’ sultana. Agħlaq bl-aħħar terz tat-taħlita tat-tiġieġ u l-aħħar terz tas-sultana.
- Tella’ l-ġnub tal-bejken għal fuq it-taħlita biex tagħlaqha bħal pakkett. Agħlaq il-landa sewwa b’biċċa foil.
- Poġġi l-landa f’dixx fond mimli b’⅔ ilma. Aħmi għal 60-70 minuta, sakemm il-pulpettun ikun sar sew minn ġewwa. Neħħi l-landa minn ġod-dixx. Ħalli l-pulpettun jibred u wara kessaħ fil-friġġ għal ftit sigħat jew lejl.
- Biex taqla’ l-pulpettun mil-landa poġġi l-landa fil-misħun, imbagħad aqleb il-pulpettun għal fuq platt. Servi kiesaħ f’biċċiet ta’ 3ċm ħxuna fuq ħobż mixwi.
Ippruvajt din ir-riċetta? Kif sibtha? Għidilna billi tħalli kumment hawn taħt.