Riċetta: Pulpetti tat-tiġieġ u t-tuffieħ

Chicken and apple patties

Il-pulpetti huma versatili ħafna, kemm fil-mod kif isservihom u kemm fl-ingredjenti li tuża. Tista’ tagħmel pulpetti minn xi ħaxix jew laħam li jkun fadallek minn ikla oħra u żżid u tħawwar it-taħlita tal-pulpetti biex toħloq xi ħaġa ġdida. Għall-pulpettti tal-lum se nuża kkapuljat tat-tiġieġ, imma faċilment tista’ tuża laħam tat-tiġieġ misjur li jkun fadallek.

Ħin: 45 minuta

Isservi: 4 persuni (madwar 8 pulpetti)

Ingredjenti:

  • 500 g kkapuljat tat-tiġieġ
  • Tuffieħa ħadra, imqaxxra u maħkuka oħxon
  • Basla żgħira, imqattgħa rqiq
  • Mgħarfa għasel
  • Mgħarfa salvja friska, imqattgħa
  • Melħ u bżar mitħun frisk
  • 2 imgħaref żejt veġetali

Tħejjija:

  1. Fi skutella ħallat l-ingredjenti kollha flimkien. Aqsam it-taħlita fi tmienja u fforma kull parti f’ballun. Iċċattja ftit kull ballun biex tifforma l-pulpetti.
  2. Saħħan nofs iż-żejt f’taġen kbir non-stick fuq nar moderat u sajjar 4 mill-pulpetti għal madwar 4 minuti fuq kull naħa, jew sakemm jiħmaru u jsiru sewwa minn ġewwa. Baxxi n-nar skont il-bżonn jekk tara li qed jinħatfu.
  3. Poġġi l-pulpetti fuq platt miksi bil-karta tal-kċina biex tneħħi ż-żejt minnhom kemm jista’ jkun. Imsaħ it-taġen u saħħan il-kumplament taż-żejt biex issajjar l-erba’ pulpetti l-oħra bl-istess mod.
  4. Servi l-pulpetti ma’ insalata mħallta u flieli tal-lumi.

Ippruvajtha din ir-riċetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar riċetti li jgħoġbuk.

Would you like to read this recipe in English? Let us know in the comments section below!