Din ir-riċetta tal-pulpetti tal-laħam hija partikolari ħafna għaliex għalkemm forsi aħna l-Maltin imdorrijin insajru l-ikkapuljat imħallat tal-majjal u ċ-ċanga f'diversi riċetti, mhux tas-soltu wisq inżidu wkoll l-ikkapuljat tal-ħaruf. Dawn it-tliet laħmijiet, flimkien mal-ingredjenti l-oħra ta' din ir-riċetta, jagħmlu pulpetti verament tajbin li tista' tikolhom ukoll bħala burgers fil-ħobż.
Ingredjenti:
- 225 g ikkapuljat tal-ħaruf
- 225 g ikkapuljat tal-majjal
- 225 g ikkapuljat taċ-ċanga b'inqas xaħam
- 1/2 kikkra frak tal-ħobż
- 1/2 kikkra tadam mixwi, imqatta'
- 1/3 ta' kikkra tursin, imqatta'
- 1/4 ta' kikkra tewm mixwi, imqatta'
- 3 imgħaref tadam imqadded, imqatta'
- 3 imgħaref bżar aħmar ħelu mixwi, imqatta'
- 2 imgħaref felfel fiż-żejt, imqatta'
- Bajda
- 1/2 kikkra nbid aħmar
- 2 kuċċarini zokkor ismar
- Kuċċarina u nofs paprika
- Kuċċarina u ponta frak tal-felfel
- 1/2 kuċċarina melħ
- 5 ħobziet tal-burgers, maqsumin, mixwijin u mdellkin bi ftit butir
- Żejt taż-żebbuġa
- Krexxun (watercress) u tadam imqatta' bħala taħwir
Tħejjija:
- Saħħan il-forn għal 190 °C.
- Ġo skutella kbira ħallat l-ingredjenti kollha minbarra l-ħobż u ż-żejt, u ħawwad sakemm jiġi uniformi. Agħmel 5 pulpetti kbar.
- Saħħan taġen sew fuq nar għoli, iksi l-qiegħ tat-taġen biż-żejt daqs 6 mm; saħħan għal 30 sekonda.
- Poġġi l-pulpetti fit-taġen. Sajjar sakemm ikunu smaru minn taħt u aqlibhom biex issajjar in-naħa l-oħra.
- Neħħi l-pulpetti mit-taġen u itfagħhom fuq tilar bil-fidda (foil).
- Sajjar il-pulpetti fil-forn għal madwar 5-7 minuti biex isiru medium done.
- Poġġi l-pulpetti fuq il-ħobż, żejjen bil-krexxun u t-tadam. Ipprova wkoll żid ftit chutney tal-mustarda u t-tadam (ara taħt). Servihom sħan.
Agħfas hawn għal riċetta taċ-chutney tal-mustarda u t-tadam.
Ippruvajt din ir-riċetta? Kif sibtha? Għidilna billi tħalli kumment jew ir-rating hawn taħt u agħfas share.
