Bħal fil-banoffie pie, il-banana u t-toffee f’din ir-riċetta jagħmlu kumbinazzjoni perfetta. Għall-kontra li jaħsbu ħafna, l-għaġina choux mhix diffiċli biex tagħmilha u r-riżultat ta’ dawn il-profiteroles ikun impressjonanti kemm fit-togħma kif ukoll fid-dehra. Imla l-forom tax-choux eżatt qabel isservihom biex ma jirtabux.

 Ħin: siegħa u 35 minuta

Isservi: 4-5 persuni

Ingredjenti:

Għall għaġina choux:

• 60 g butir
• 75 g dqiq, mgħarbul
• 2 bajdiet, imħabbtin ħafif

Għaz-zalza tat-toffee:

• 30 g butir
• 90 g zokkor muscovado
• 150 ml krema doppja
• ½ kuċċarina essenza tal-vanilla

Għall-mili:

• 3 bananiet misjurin
• 2 imgħaref zokkor fin (caster sugar)
• Meraq ta’ lumija
• 300 ml krema tat-tħabbit  (whipping cream)

Tħejjija:

1. Saħħan il-forn għal temperatura ta’ 220°C. Iksi tilar bil-kartaforn.
2. Biex tagħmel l-għaġina:
   1. Ferra’ 150 ml ilma f’kazzola mdaqqsa u żid il-butir.
   2. Poġġihom fuq nar baxx sakemm jinħall il-butir, imbagħad għolli n-nar sakemm it-taħlita tiftaħ tagħli.
   3. Malajr neħħi l-kazzola minn fuq in-nar u itfa’ d-dqiq u , b’mgħarfa tal-injam ħawwad sakemm it-taħlita tingħaqad f’ballun u tinqala’ minn mal-ġnub tal-kazzola.
   4. Ħalli l-għaġina tibred għal 15-il minuta.
3. Żid il-bajd bil-mod filwaqt li tħabbat sakemm ikollok paste lixxa u tleqq.
4. Imla piping bag kbira, bil-ponta lixxa, bit-taħlita tax-choux u agħmel 16-il forma tonda (ftit ikbar mid-daqs ta’ ġewża) fuq it-tilar.
5. Aħmihom fuq xkaffa ’l fuq minn nofs il-forn għal 15-il minuta sakemm jintnefħu u jieħdu kulur dehbi ċar; imbagħad oħroġhom mill-forn, taqqab kull waħda bi stikka biex toħroġ l-arja u kompli aħmihom għal 10 minuti oħra. Poġġihom fuq gradilja biex jibirdu.
6. Biex tagħmel iz-zalza tat-toffee:
   1. Dewweb il-butir f’kazzola fuq nar baxx u żid iz-zokkor, il-krema u l-essenza  tal-vanilla.
   2. Ħawwad it-taħlita sakemm jinħall iz-zokkor u tektek sakemm tibda tagħqad.
   3. Tħallix it-taħlita tagħqad iżżejjed peress li din tkompli tagħqad meta tibred.
7. Aqsam kull profiterole min-nofs mingħajr ma’ tasal sat-tarf.
8. Biex tagħmel il-mili:
   1. Għaffeġ il-banana, żid il-meraq tal-lumi u z-zokkor u ħallat kollox sew flimkien.
   2. Ħabbat il-krema sakemm tibqa’ wieqfa u daħħalha bil-mod fit-taħlita tal-banana.
   3. Imla l-piping bag bit-taħlita  u biha imla l-forom tax-choux.
9. Irranġa l-profiteroles fuq platt fuq xulxin u ferra’ nofs z-zalza tat-toffee fuqhom.
10. Żomm in-nofs l-ieħor f’buqar u servih mal-profiteroles.

Ippruvajtha din ir-ricetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.

Would you like to read this recipe in English? Let us know in the comments section below!