Riċetta: Pitravi bil-ġbejniet u l-ġewż

Platt ikkulurit immens li tista’ sservih bħala akkumpanjament ta’ platti oħra jew bħala l-ewwel platt. Minbarra l-kuluri vibranti li għandu dan il-platt, it-togħmiet tal-ingredjenti wkoll jikkuntrastaw, bil-pitravi ħelwa, il-ġbejna mielħa u ratba, u l-ġewż xi ftit qares u jqarmeċ.

Ingredjenti

Għal 4 persuni

  • 4 pitraviet (madwar 700g) bit-truf maqtugħin
  • 60ml żejt taż-żebbuġa
  • 1 mgħarfa ħall tal-inbid aħmar
  • Melħ u bżar mitħun frisk
  • Niskata zokkor
  • 1½ mgħarfa tursin frisk imqatta’
  • 30g ġewż, imkisser
  • 40g gbejniet nixfin, imfarrkin

 

Metodu

  1. Saħħan il-forn għal temperatura ta’ 180°C. Poġġi l-pitravi fuq tilar u roxx fuqhom mgħarfa żejt taż-żebbuġa, dawwar il-pitravi fit-tilar biex jinksew kompletament. Ixwi fil-forn għal siegħa, sakemm ponta ta’ sikkina tidħol fil-pitravi. Oħroġ il-pitravi mill-forn u ħallihom jibirdu għal 15-il minuta.
  2. Qaxxar il-pitravi (ilbes l-ingwanti jekk ma tridx ittebba’ subgħajk). Qatta l-pitravi roti roti, 1ċm ħxuna, mill-wisa’. Irranġahom f-forma tonda fuq il-platti.
  3. Ħabbat flimkien il-kumplament taż-żejt u l-ħall f’bieqja. Żid il-melħ, il-bżar, iz-zokkor u t-tursin u ħallat kollox sew.
  4. Roxx it-taħlita fuq il-pitravi u ferrex il-ġbejniet u l-ġewż. Servi fil-pront.

 

Ippruvajt din ir-riċetta?  Kif sibtha? Għidilna billi tħalli kumment jew ir-rating hawn taħt u agħfas share.