Verżjoni b’xeħta tropikali tal-lemon meringue pie b’mili tal-ananas, aktar magħruf bħala pineapple.

Ħin: siegħa u nofs

Isservi: 8 persuni

Ingredjenti:

Għall-għaġina:

• 75 g butir, temperatura tal-kamra
• 150 g dqiq, mgħarbul

Għall-mili:

• 200 g zokkor
• Bott ananas (pineapple) ta’425 g
• 2 mgħaref dqiq tal-qamħirrun (corn flour)
• 3 isfra tal-bajd (l-abjad użah għall-ixkuma)
• Mgħarfa meraq tal-lumi

Għall-ixkuma:

• 6 mgħaref zokkor fin (caster sugar)
• 3 abjad tal-bajd

Tħejjija:

1. Biex tagħmel l-għaġina: Poġġi d-dqiq u l-butir fi skutella u daħħal il-butir fid-dqiq bil-ponot ta’ subgħajk (rub in). Żid 2 mgħaref ilma u b’sikkina ħawwad biex tgħaqqad it-taħlita flimkien. Roxx il-mejda bid-dqiq, tella’ l-għaġina u għaġinha sakemm tillixxa. Dawwarha fil-plastik u poġġiha fil-friġġ għal 20 minuta.
2. Idlek landa baxxa (flan tin)ta’ 23 ċm tal-qiegħ jinqala’ bil-butir. Iftaħ l-għaġina u iksi l-landa biha. Daħħal il-landa fil-friġġ għal 20 minuta.
3. Saħħan il-forn għal temperatura ta’ 200°C. Taqqab l-għaġina b’furketta u iksiha b’biċċa foil. Imla l-forma bil-fażola niexfa u aħmi għal 15-il minuta (bake blind). Neħħi l-fażola u l-foil u kompli aħmi għal 10 minuti oħra, sakemm tiħmar. Oħroġ il-landa mill-forn u baxxi t-temperatura għal 150°C.
4. Biex tagħmel il-mili: Saffi l-ananas mill-meraq, poġġi l-ananas fi skutella u għaffġu b’masher jew mgħarfa tal-injam. F’kazzola ħallat flimkien 100 ml mill-meraq tal-ananas u d-dqiq tal-qamħirrun, imbagħad żid iz-zokkor u l-ananas u ħawwadhom. Poġġihom fuq nar baxx sakemm jagħlu, u ħawwad għal 2 minuti sakemm it-taħlita tibda tagħqad. Neħħi l-kazzola minn fuq in-nar, ħalliha tieqaf tbaqbaq, żid l-isfra tal-bajd u ibqa’ ħawwad. Erġa’ poġġi l-kazzola fuq in-nar u ħawwad għal 2 minuti oħra. Neħħi l-kazzola minn fuq in-nar, żid il-meraq tal-lumi u ħawwad.
5. Biex tagħmel l-ixkuma: Ħabbat l-abjad tal-bajd sakemm jitla’u jieqaf. Ħabbat iz-zokkor mal-ixkuma ftit ftit.
6. Ifrex it-taħlita tal-ananas fil-forma tal-għaġina u llixxa l-wiċċ. Ifrex ukoll l-ixkuma u biha iksi l-wiċċ kompletament. Għolli l-wiċċ tal-ixkuma b’furketta biex tifforma l-ponot.
7. Aħmi għal 13-15-il minuta sakemm jiħmar il-wiċċ. Ħalli t-torta tiksaħ kompletament qabel taqsamha biex isserviha.

Ippruvajtha din ir-riċetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar riċetti li jgħoġbuk.

Would you like to read this recipe in English? Let us know in the comments section below!