Riċetta: Penne bl-inċova, żebbuġ u kappar

Anchovies olives and capers penne

Dan il-platt għaġin huwa għall-gosti ta’ dawk li jħobbu l-ikel b’togħma qawwija għax f’din iz-zalza nsibu l-filfel, inċova, kappar u żebbuġ!

Ħin: siegħa

Isservi: 4 persuni

Ingredjenti:

  • 400 g penne, jew għaġin ieħor simili
  • Mgħarfa żejt taż-żebbuġa
  • Basla, imqattgħa rqiq
  • 2 siniet tewm, imqattgħin
  • Bżaru filfel, imnaddaf u mqatta’
  • 4 biċċiet inċova, imqattgħin irqiq
  • 2 mgħaref kappar, imlaħlaħ
  • 100 g żebbuġ iswed, mingħajr għadma u mqatta’
  • 2 mgħaref kunserva
  • 800 g polpa tat-tadam, jew tadam frisk imqaxxar u mqatta’
  • Kuċċarina zokkor
  • Mgħarfa nagħniegħ frisk, imqatta’
  • 2 mgħaref tursin frisk, imqatta’
  • Bżar mitħun frisk

 

Tħejjija:

  1. Saħħan iż-żejt f’taġen fuq nar moderat u qalli l-basla sakemm tirtab, imbagħad żid it-tewm, l-inċova, il-kappar u l-filfel u kompli qalli għal minuta oħra. Żid il-kunserva u ħawwad għal żewġ minuti, imbagħad żid il-polpa jew tadam, iz-zokkor u 120 ml ilma. Meta z-zalza tiftaħ tagħli baxxi n-nar u tektek għal 25 minuta jew sakemm tara li z-zalza nġibdet. Żid in-nagħniegħ, iż-żebbuġ u bżar u ħawwad.
  2. Sadanittant, f’borma kbira bl-ilma bil-melħ għalli l-għaġin sakemm isir al dente.
  3. Saffi l-għaġiin u ħalltu sew maz-zalza. Servi fil-pront bit-tursin imferrex fil-wiċċ.

Ippruvajtha din ir-ricetta ta' penne bl-inċova, żebbuġ u kappar? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.