Riċetta: Penne biz-zalza tal-brunġiel

penne

Huwa faċli immens li toħloq platt għaġin li fih tinkludi wkoll ammont sostanzjali ta’ ħaxix. F’din ir-riċetta nsibu żewġ ingredjenti li hawn bħalissa fl-istaġun u li huma prodott Malti: il-brunġiel u t-tadam, li nsibu b’abbundanza tul is-sajf kollu.

Ħin: siegħa

Isservi: 4 persuni

Ingredjenti:

  • 400 g għaġin penne
  • 2 mgħaref żejt taż-żebbuġa
  • 500 g brunġiel, imqatta’ dadi żgħar bil-qoxra b’kollox
  • 2 basliet, imqattgħin irqiq
  • 4 sinniet tewm, imqattgħin
  • 100 g bacon, imqatta’
  • 8 tadamiet, imqaxxrin, imnaddfin u mqattgħin
  • Mgħarfa kunserva
  • 150 ml inbid aħmar
  • 200 ml stokk tal-ħaxix jew tat-tiġieġ
  • Kuċċarina origanu mnixxef, jew mgħarfa frisk, imqatta’
  • 2 mgħaref ħabaq frisk, imqatta’
  • 250 g mozzarella, imqattgħa dadi żgħar
  • Żejt taż-żebbuġa, biex isservi

 

Tħejjija:

  1. Saħħan iż-żejt f’taġen kbir jew kazzola fuq nar moderat. Żid il-basal, it-tewm u l-bacon u qalli għal 5 minuti, imbagħad żid il-brunġiel u kompli qalli sakemm dan jibda jirtab. Żid l-inbid u ħallih jinxtorob kważi kollu, imbagħad żid il-kunserva u l-istokk, ħawwad u żid il-polpa jew it-tadam, l-origanu, melħ u bżar. Ħalli z-zalza tiftaħ tagħli, imbagħad tektek bit-taġen mgħotti parzjalment għal madwar 30 minuta, jew sakemm iz-zalza tibda tagħqad.
  2. Sadanittant, għalli l-penne f’borma kbira ilma nil-melħ sakemm isir al dente.
  3. Saffi l-għaġin u żidu maz-zalza (jew viċiversa) u ħawwadhom sew flimkien. Żid il-mozzarella u l-ħabaq u erġa’ ħawwad.
  4. Servi fil-pront bi ftit żejt taż-żebbuġa mraxxax fil-wiċċ.

Ippruvajtha din ir-ricetta ta' penne biz-zalza tal-brunġiel? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.