Riċetta: Penne bit-tiġieġ, pastard u ġobon Gruyere

Penne with chicken, cauliflower and gruyere cheese: Penne bit-tiġieġ, pastard u ġobon Gruyere

Il-pastard nistgħu nużawh f’diversi riċetti u m’għandux jitqies bħala ħaxixa tas-sopop u minestri biss. F’din ir-riċetta huwa miżjud mal-għaġin u tiġieġ u flimkien joħolqu platt appetituż li fih ftit minn kollox.

Ħin: 35 minuta

Isservi: 4 persuni

Ingredjenti:

  • 250 għaġin penne
  • 300 g fjuretti tal-pastard
  • 350 sider tat-tiġieġ mingħajr ġilda, imqatta’ dadi
  • Mgħarfa żejt taż-żebbuġa
  • Basla, imqattgħa rqiq
  • 2 sinniet tewm, imqattgħin irqiq
  • 125 ml inbid abjad
  • 250 ml krema singla
  • 3 imgħaref dqiq
  • 100 g ġobon Gruyere, imfarrak
  • Kuċċarina mustarda Dijon
  • Melħ u bżar mitħun frisk
  • 2 imgħaref kurrat selvaġġ (chives), imqatta’

 Tħejjija:

  1. Poġġi s-sider tat-tiġieġ u l-pastard f’kazzola u għattihom bl-ilma. Poġġihom fuq nar għoli sakemm jagħlu, imbagħad baxxi n-nar u sajjar għal 12-13-il minuta, jew sakemm it-tiġieġ ikun sar kompletament. Saffi u żomm l-ilma għal aktar tard.
  2. Għalli l-għaġin f’borma kbira ilma bil-melħ sakemm isir al dente.
  3. Sadanittant, saħħan iż-żejt f’taġen kbir u qalli l-basla u t-tewm sakemm jirtabu. Żid l-inbid u ħallih jinxtorob għal 2 minuti. Roxx id-dqiq fil-wiċċ filwaqt li tħawwad kontinwament. Kejjel 500 ml mill-ilma li tkun sajjart it-tiġieġ fih u żidu bil-mod fit-taġen filwaqt li tkompli tħawwad sakemm jibda jagħqad, imbagħad żid ukoll il-krema, il-mustarda, it-tiġieġ u l-pastard, u bżar u melħ. Ħawwad għal 2 minuti oħra sakemm jisħon kollox.
  4. Saffi l-għaġin u żidu maz-zalza fuq in-nar. Żid il-ġobon Gruyere u ħawwad għal minuta sakemm jinħall il-ġobon u jitħalltu t-togħmiet.
  5. Servi fil-pront bil-kurrat selvaġġ fil-wiċċ.

Ippruvajtha din ir-ricetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.

Ara din il-lista ta' ħaxix u frott lokali u l-istaġun tiegħu hawn Malta

Would you like to read this recipe in English? Let us know in the comments section below!