Riċetta: Patata mfarrka bil-ħxejjex aromatiċi

Mashed potatoes with herbs

Għal din ir-riċetta tista’ tibdel il-ħxejjex aromatiċi skont dak li tiggosta jew dak li ssib. Tista’ wkoll tuża ħxejjex aromatiċi mnixxfin minflok friski, imma dejjem uża nofs il-kwantità tal-frisk. Din il-patata tista’ tisserva sħuna jew f’temperatura tal-kamra.

Ħin: 35 minuta

Isservi: 4 persuni

Ingredjenti:

  • 800 g patata bajda, imqaxxra u maqsuma fi tnejn jew erba’ biċċiet, skont id-daqs tagħha; jekk tkun patata ġdida tista’ tħalliha bil-qoxra
  • 120 ml żejt taż-żebbuġa
  • mgħarfa sagħtar frisk, imqatta’
  • mgħarfa origanu frisk, imqatta’
  • mgħarfa kurrat selvaġġ, imqatta’
  • niskata melħ oħxon
  • bżar mitħun frisk

 

Tħejjija:

  1. Poġġi l-patata f’kazzola, għattiha bl-ilma u għalliha għal 15-20 minuta jew sakemm tirtab sew.
  2. Sadanittant f’kazzola żgħira saħħan ftit iż-żejt u żid is-sagħtar u l-origanu, u neħħi minn fuq in-nar. Dan jgħin biex it-togħmiet joħorġu u jamalgamaw aktar.
  3. Saffi l-patata u ifqa’ kull biċċa b’furketta mingħajr ma tgħaffiġha żżejjed. Poġġi l-patata fi skutella u ferra’ fuqha ż-żejt bil-ħxejjex aromatiċi. Roxx bil-melħ oħxon u bżar mitħun frisk u ħawwad bil-mod b’mgħarfa tal-injam.
  4. Roxx il-kurrat selvaġġ fil-wiċċ u servi.

Ippruvajtha din ir-ricetta ta' patata mfarrka bil-ħxejjex aromatiċi? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.