It-togħma kemxejn qawwija li għandu l-gorgonzola tagħmel kuntrast tajjeb ma’ ingredjenti bħall-cranberries u patata ħelwa. Meta sservi dan il-platt lill-mistednin tiegħek żgur timpressjonahom u tħajjarhom għal aktar.
Ingredjenti
Għal 6 persuni
- 6 patatiet ħelwin, imdaqqsin
- ¼ kikkra butir imdewweb
- ½ kuċċarina melħ
- ¼ kikkra maple syrup pur
- ¼ kikkra tursin, imqatta’ rqiq ħafna
- qoxra maħkuka ta’ lumija
- 1 sinna tewm, imqattgħa rqiq
- 3 mgħaref ġewż pecan, imqatta’ rqiq
- 3 mgħaref cranberries nixfin, imqattgħin
- 1 basla ħadra, imqattgħa rqiq
- 50g ġobon gorgonzola, imfarrak
- Saħħan il-forn għal temperatura ta’ 230°C.
- Poġġi l-patata fuq tilar u aħmi għal 30 minuta. Aqleb il-patata bil-kontra u kompli aħmi għal 20 minuta oħra, sakemm il-patata tirtab. Oħroġ it-tilar mill-forn.
- Meta l-patata tkun birdet biżżejjed, qaxxarha.
- F’taġen fuq nar medju poġġi l-butir, il-melħ u l-maple syrup flimkien mal-patata għal 5 minuti, filwaqt li kultant ixxarrab il-patata bit-taħlita.
- Kisser il-patata ħafif, u żomm it-taġen fuq nar bati ħafna.
- Biex tagħmel it-taħlita tal-wiċċ, ħallat flimkien it-tursin, il-qoxra maħkuka ta’ lumija, it-tewm, il-ġewż pecan, il-cranberries u l-basla f’bieqja. Daħħal magħhom il-gorgonzola bil-mod.
- Poġġi l-patata fir-reċipjent li se sservi fih u ferrex fuqha t-taħlita tal-gorgonzola. Servi fil-pront.