Parti mill-ikla tal-Maltin u l-Għawdxin hija bla ebda dubju l-patata, tkun kif tħun imsajra. Biex invarjaw ftit, din hija riċetta ta’ patata bil-ġobon u l-bacon, li tista’ sservi ma’ laħam jew tiġieġ mixwi, inkella ma’ insalata biss għax minnha nnifisha hija ikla.
Ħin: siegħa u 15-il minuta
Isservi: 4 persuni
Ingredjenti:
- 4 patatiet tawwalin u lixxi bil-qoxra rqiqa, maħsulin u xxuttati
- 2 imgħaref butir imdewweb
- Basla żgħira, imqattgħa rqiq ħafna
- 2 sinniet tewm, imqattgħin irqiq
- 2 imgħaref tursin frisk, imqatta’
- Mgħarfa sagħtar frisk (thyme), jew kuċċarina mnixxef
- 50 g ġobon cheddar, maħkuk oħxon
- 50 g bacon tal-għonq, imqatta’ rqiq
- 2 imgħaref ġobon Parmiġġan, maħkuk
- Melħ u bżar mitħun frisk
Tħejjija:
- Saħħan il-forn għal temperatura ta’ 200°C. Iksi tilar bil-kartaforn.
- Poġġi l-patata ċatta fuq il-mejda u felliha ½ ċm minn xulxin mingħajr ma’ tasal sat-tarf ta’ taħt biex il-patata tibqa’ sħiħa. Biex tevita li taqtagħha kompletament poġġi l-manku ta’ mgħarfa tal-injam mimdud quddiem il-patata biex meta taqta’ s-sikkina tieqaf sal-manku.
- Idlek il-patata bi ftit mill-butir u poġġiha fuq it-tilar. Aħmi l-patata għal 45 minuta
- Sadanittant, f’taġen poġġi l-butir li jkun fadal u qalli l-basla u l-bacon. Neħħi minn fuq in-nar u poġġihom fi skutella biex jibirdu.
- Żid il-ġobon cheddar, it-tursin u s-sagħtar, u melħ u bżar. Ħallat kollox u bit-taħlita imla l-flieli tal-patata kemm jista’ jkun mingħajr ma taqsamha. Li jibqa’ mit-taħlita ifirxu fuq wiċċ il-patata.
- Roxx bil-ġobon Parmiggan u kompli aħmi għal 15-il minuta oħra.
Ippruvajtha din ir-riċetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar riċetti li jgħoġbuk.
Would you like to read this recipe in English? Let us know in the comments section below!
