Riċetta: Patata bil-curry

Potato curry: Patata bil-curry

It-togħma tal-curry tmur ħafna mal-patata. Din ir-riċetta ta’ patata bil-basal u l-curry hija adattata biex isserviha ma laħam jew tiġieġ mixwi lixx peress li l-patata diġà fiha togħma pjuttost qawwija. Tista’ wkoll tnaqqas il-kwantità tal-curry għall-gosti tiegħek.

Preparazzjoni: 5 minuti

Ħin totali: 25 minuta

Isservi: 4 persuni

Ingredjenti:

  • 1 kg patata
  • Mgħarfa żejt veġetali
  • Basla, maqsuma min-nofs u mqattgħa għat-tul
  • Kuċarina zokkor
  • Mgħarfa curry
  • 100 ml ilma
  • 4 imgħaref jogurt naturali
  • 2 imgħaref weraq tal-kosbor frisk, imqatta’
  • Melħ u bżar mitħun frisk

Tħejjija:

  1. Qaxxar il-patata u aqsamha f’biċċiet indaqs. Poġġiha f’kazzola u għattiha bl-ilma. Poġġiha fuq nar għoli sakemm tiftaħ tagħli, imbagħad baxxi n-nar u tektek għal 12-15-il minuta jew sakemm il-patata ssir mingħajr ma titfarrak.
  2. Sadanittant, saħħan iż-żejt f’taġen. Żid iz-zokkor u l-basla u qalli għal 5 minuti jew sakemm il-basla tirtab.
  3. Ħoll il-curry fl-ilma u żidu mal-basla fit-taġen, ħallih jibda jagħli u neħħi minn fuq in-nar.
  4. Saffi l-patata mill-ilma, żidha mat-taħlita fit-taġen. Roxx bil-melħ u l-bżar u ħallat kollox flimkien.
  5. Aqleb il-patata fi platt kbir jew dixx li se sservi fih u ferra’ fuqha l-jogurt. Roxx bil-weraq tal-kosbor u servi.

Ippruvajtha din ir-ricetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.

Would you like to read this recipe in English? Let us know in the comments section below!