Riċetta: Papra mixwija u lanġas fl-inbid aħmar

Roast duck with pear in red wine Papra mixwija u lanġas fl-inbid aħmar

Read this recipe in English: Roast duck with pear in red wine

Insibu ħafna riċetti tal-papra biz-zalza tal-larinġ, imma f’din ir-riċetta l-papra hija akkumpanjata mil-lanġas, u msajra fl-immarinar li fih issajjar il-lanġas stess.

Ingredjenti

Għal 2 persuni

  • 2 lanġasiet kbar sodi, imqaxxrin
  • 500ml inbid aħmar
  • 250ml ilma
  • 60ml liqueur tal-blackcurrant jew vermut aħmar ħelu
  • 2 mgħaref zokkor fin (caster sugar)
  • 1 bastun tal-kannella (cinnamon stick)
  • 2 isdra tal-papra, bil-ġilda u mingħajr xaħam (175g kull waħda)
  • Melħ oħxon
  • 125ml stokk tat-tiġieġ
  • 1 mgħarfa ħall balsamiku

 

 Metodu

  1. Saħħan il-forn għal temperatura ta’ 160°C. Aqta’ barra b’sikkina l-qiegħ tal-lanġas biex joqgħod wieqaf.
  2. Ħallat l-inbid, il-liqueur jew vermut, l-ilma, iz-zokkor u l-bastun tal-kannella f’kazzola u poġġihom fuq nar moderat. Ħawwad għal 2-3 minuti sakemm jinħall iz-zokkor. Poġġi l-lanġas fil-likwidu u tektek għal 20 minuta. Dawwar il-lanġas kull tant ħin biex isir minn kull naħa. Neħħi minn fuq in-nar u ħallihom għal siegħa jibirdu.
  3. Sadanittant, b’sikkina taqta’, fellel il-ġilda tal-papara kull 1ċm. Ogħrok il-papra bil-melħ u ħalliha hekk għal 15-il minuta. Saħħan taġen fuq nar moderat u poġġi l-papra bil-ġilda ’l isfel. Ixwi għal 5 minuti fuq kull naħa sakemm tieħu kulur dehbi. Poġġi l-papra f’dixx tal-forn u għatti bil-foil. Daħħal id-dixx fil-forn għal 10 minuti jew sakemm il-papra ssir għall-gosti tiegħek.
  4. B’mgħarfa mtaqqba tella’ l-lanġas mill-kazzola u poġġih f’bieqja. Żomm 125ml mil-likwidu tal-inbid. Mill-gravy li ħareġ mill-papra (tat-taġen) ħu 2 kuċċarini u poġġihon f’kazzola oħra. Magħhom żid il-125ml likwidu tal-inbid li tkun erfajt, l-istokk tat-tiġieġa u l-ħall balsamiku. Poġġi l-kazzola fuq nar għoli u kif tiftaħ tagħli naqqas in-nar u ħalliha tbaqbaq mikxufa għal 3-5 minuti, jew sakemm l-ammont jonqos bin-nofs. Żid il-lanġas u saħħan għal 5 minuti.
  5. Qatta’ l-papra f’biċċiet ħoxnin mill-wisa’ u servi mal-lanġas u z-zalza.

Ippruvajt din ir-riċetta?  Kif sibtha? Għidilna billi tħalli kumment hawn taħt.