Meta mmorru nżuru lil xi ħadd, jew inkunu mistednin għand il-ħbieb u tal-familja fil-festi tal-Milied dejjem naħsbu biex nieħdu xi ħaġa magħna. Il-pannettone huwa wieħed mir-rigali li jingħata b’dan il-mod, għalhekk kultant nispiċċaw ikollna kollezzjoni ta’ pannettone f’xi armarju. Għalkemm il-pannettone huwa ħelu minnu nniffsu, tista’ tittrasformah u tużah biex tagħmel ħelu ieħor, speċjalment deżerti. Din hija riċetta ħafifa ħafna ta’ kif tista’ tibdel pannettone f’deżerta delizzjuża.
Ingredjenti
Għal 4 persuni
- 3 bajdiet
- 80ml krema singla
- 2 mgħaref zokkor fin (caster sugar)
- ½ kuċċarina essenza tal-vanilla
- 2 roti tal-pannettone bi ħxuna ta’ 1.5ċm ( maqtugħin orizzontali), maqsumin f’erbgħa
- 250g berries tal-friża mħalltin, bil-friża mniżżla
- 2 mgħaref zokkor tal-ġelu, u aktar biex troxx
- 40g butir
- Krema doppja mħabbta biex isservi
Metodu
- F’bieqja wiesgħa u baxxa ħabbat flimkien il-bajd, il-krema , il-ħalib, iz-zokkor u l-vanilla. Għerraq il-biċċiet tal-pannettone fil-likwidu u ħallihom jixxarbu għal 10 minuti. Agħfashom ’l isfel kull tant ħin.
- Sadanittant poġġi nofs il-berries fi blender maz-zokkor tal-ġelu u mgħarfa ilma. Itħan sakemm ikollok taħlita lixxa. Żid il-kumplament tal-berries u ħalli t-taħlita f’ġenb.
- Saħħan nofs il-butir f’taġen fuq nar medju. Saffi l-likwidu żejjed minn nofs il-kwantità tal-pannettone u aqlihom fil-butir għal minuta jew tnejn fuq kull naħa sakemm jiħmaru. Żommhom sħan sakemm tirrepeti l-istess proċess fuq in-nofs l-ieħor.
- Biex isservi poġġi żewġ biċċiet pannettone fuq kull platt, għarbel fuqhom ftit żokkor tal-ġelu, fererx ukoll iz-zalza tal-berries u servi bil-krema mħabbta fil-ġenb.
Ippruvajt din ir-riċetta? Kif sibtha? Għidilna billi tħalli kumment jew ir-rating hawn taħt u agħfas share.