Riċetta: Panna cotta tal-yoghurt bit-tut

Black mulberry yoghurt panna cotta

Il-panna cotta hija deżerta irreżistibbli kremuża u ħafifa . Għal din ir-riċetta użajt ukoll il-yoghurt. Meta t-tut ma jkunx fl-istaġun tista’ tuża frott ieħor ukoll.

Ħin: 50 minuta, u ħin biex tkessaħ

Isservi: 6 persuni

Ingredjenti:

Għall-panna cotta:

  • 500 ml yoghurt naturali
  • 450 ml krema doppja
  • 150 g zokkor
  • 2½ kuċċarini ġelatina
  • 2 mgħaref meraq tal-lumi
  • 2 mgħaref ilma
  • Żejt veġetali

Għax-xropp tat-tut:

  • 500 g tut; u aktar biex iżżejjen
  • 50 g zokkor
  • 60 ml ilma
  • Meraq ta’ nofs lumija
  • Weraq tan-nagħniegħ, biex iżżejjen

 

Tħejjija:

  1. Biex tagħmel il-panna cotta: Idlek 6 kikkri kbar jew skutelli żgħar bi ftit żejt.
  2. Fi skutella ħallat 2 mgħaref ilma u l-meraq tal-lumi. Ferrex il-ġelatina fil-wiċċ u ħalliha toqgħod għal 15-il minuta.
  3. Sadanittant ħabbat nofs l-ammont tal-krema mal-yoghurt. Poġġi l-kumplament tal-krema f’kazzola maz-zokkor fuq nar moderat u ħawwad sakemm it-taħlita tibda ttektek u jinħall iz-zokkor. Neħħi l-kazzola minn fuq in-nar u żid il-ġelatina, u ħabbat sakemm tinħall. Żid it-taħlita tal-krema u ġelatina mat-taħlita tal-krema u yoghurt u ħabbathom sew flimkien.
  4. Qassam it-taħlita finali bejn il-kikkri jew skutelli u poġġihom fil-friġġ għal mill-inqas 8 sigħat jew tul il-lejl.
  5. Biex tagħmel ix-xropp tat-tut: F’kazzola poġġi t-tut, iz-zokkor, l-ilma u l-meraq tal-lumija fuq nar moderat sakemm jiftħu jagħlu. Baxxi n-nar u tektek għal 20-25 minuta, sakemm it-tut jinfaqa’u x-xropp jinġibed u ma jibqax immerraq ħafna. Għaddi x-xropp minn passatur u armi ż-żerriegħa. Poġġih f’vażett magħluq fil-friġġ.
  6. Biex isservi: Dawwar sikkina mad-dawra tal-panna cotta biex tifridha minn mar-reċipjent. Bill il-kikkri/skutelli fi skutella kbira ilma jaħraq għal ftit sekondi u aqleb kul waħda fuq platt ċatt. Bil-mod aqla’ r-reċipjent minn mal-panna cotta. Ferra’ ftit xropp fuq kull porzjon u żejjen bit-tut u weraq tan-nagħniegħ.

Ippruvajtha din ir-ricetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar riċetti li jgħoġbuk.