Riċetta: Orecchiette b’zalza tal-vitella u kappar

Orecchiette with veal and capers

Għal min iħobb l-għaġin aktar ħafif mingħajr iż-żieda ta’ zlazi tqal, imma fl-istess ħin iħobb l-għaġin bil-laħam, din ir-riċetta tal-orecchiette hija ideali, bi ftit ingredjenti u sempliċi.

Ħin: 45 minuta

Isservi: 4 persuni

Ingredjenti:

  • 500 g ikkapuljat tal-vitella
  • 350 g għaġin orecchiette
  • Basla kbira, imqattgħa rqiq
  • 2 sinniet tewm, imqattgħin irqiq
  • 2 mgħaref żejt taż-żebbuġa
  • 150 ml inbid abjad
  • 300 ml stokk tat-tiġieġ
  • Melħ u bżar mitħun frisk
  • ½ kuċċarina klin (rosemary), imnixxef
  • 2 mgħaref kappar, imlaħlaħ
  • 75 g ġobon Parmiġġan, maħkuk
  • 2 mgħaref tursin frisk, imqatta’

 

Tħejjija:

  1. Saħħan iż-żejt taż-żebbuġa f’taġen kbir fuq nar moderat. Żid il-basla u t-tewm u qalli sakemm tirtab il-basla, imbagħad żid l-ikkapuljat tal-vitella, u melħ u bżar u ħawwad sakemm il-vitella tieħu l-kulur.
  2. Ferra’ l-inbid fit-taġen u ħallih jagħli sakemm jinxtorob kważi kollu, imbagħad ferra’ l-istokk u żid il-kappar u l-klin, baxxi n-nar u tektek għal madwar 10 minuti sakemm il-likwidu jonqos bin-nofs.
  3. Sadanittant, għalli l-għaġin tal-orecchiette f’borma kbira ilma bil-melħ sakemm isir al dente. Saffi l-għaġin u żidu fit-taġen maz-zalza, żid il-ġobon Parmiġġan u t-tursin u ħawwad għal 1-2 minuta.
  4. Servi fil-pront.

Ippruvajtha din ir-ricetta tal-orecchiette ? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.

Would you like to read this recipe in English? Let us know in the comments section below!