Riċetta: Merluzz bil-mustarda u l-kappar

Cod with mustard and capers

Ħafna drabi r-riċetti tal-ħut jispeċifikaw ħuta partikolari, imma fil-biċċa l-kbira tagħhom tista’ tuża minflok ħut simili tal-istaġun jew tal-gosti tiegħek, kif ukoll iffriżat, u jkollok l-istess riżultati.

Ħin: 50 minuta

Isservi: 4 persuni

Ingredjenti:

  • 4 biċċiet flett tal-merluzz, jew ħut ieħor abjad frisk jew iffriżar (madwar 1 kg b’kollox)
  • 400 g spinaċi tal-friża, bil-friża mniżżla; jew spinaċi friska, mgħollija u msaffija

Għaz-zalza:

  • 50 g butir
  • 50 g dqiq
  • Meraq ta’ lumija
  • 400 ml ħalib
  • Basla żgħira, maqsuma f’erba’ flieli
  • 2 werqiet tar-rand
  • 6 bżariet sħaħ (pepper corns)
  • Kuċċarina mustarda
  • 2 mgħaref kappar, imlaħlaħ
  • Weraq tax-xibt (dill) frisk, jew weraq tat-tursin imqatta’
  • Melħ u bżar mitħun frisk

 

Tħejjija:

  1. Poġġi l-ispinaċi f’passatur biex tqattar kemm jista’ jkun mill-ilma.
  2. Saħħan il-forn għal temperatura ta’ 200°C. Iksi dixx tal-forn bil-kartaforn.
  3. Poġġi l-ħalib f’kazzola mal-basla, weraq tar-rand, il-basla u l-imsiemer tal-qronfol. Saħħan il-kazzola fuq nar moderat mingħajr ma’ tħalli l-ħalib jagħli. Neħħiha minn fuq in-nar u ħalli l-ħalib jibred.
  4. F’kazzola oħra dewweb il-butir u żid id-dqiq. Ħawwad b’mgħarfa tal-injam sakemm it-taħlita ssir ballun, u kompli ħawwad għal ftit sekondi oħra.
  5. Saffi l-ħalib u ferra’ ftit minnu mat-taħlita tad-dqiq u butir. Ħabbat b’ħabbata tal-bajd kontinwament filwaqt li tkompli żżid il-ħalib ftit ftit. Żid il-meraq tal-lumi u l-mustarda, il-kappar, u melħ u bżar, u ħawwad kollox sew.
  6. Ifrex l-ispinaċi fid-dixx u poġġi l-flett tal-ħut ħdejn xulxin fuqu. Ferra’ z-zalza fuq kollox u aħmi għal 20-25 minuta jew sakemm il-ħut ikun sar.
  7. Roxx bix-xibt jew tursin u servi sħun.

Ippruvajtha din ir-ricetta tal-merluzz ? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.

Would you like to read this recipe in English? Let us know in the comments section below!