Riċetta: Lasagna tal-polenta u tiġieġ

Recipe of chicken and polenta lasagna Riċetta: Lażanja tal-polenta u tiġieġ

Lasagna b’differenza: minflok l-għaġin insibu l-polenta, u post l-ikkapuljat taċ-ċanga jieħdu l-ikkapuljat tat-tiġieġ, b’riżultat mhux tas-soltu imma eċċellenti.

Ħin: siegħa u 10 minuti, u 4 sigħat biex tkessaħ

Isservi: 6 persuni

Ingredjenti:

  • 1 mgħarfa żejt taż-żebbuġa, u aktar biex tidlek
  • 1lt stokk tat-tiġieġ
  • 170g polenta
  • 60g ġobon Parmiġġan, maħkuk
  • 100g listi tal-bacon, imqattgħin
  • 1 kurrata, il-parti l-bajda u ħadra ċara biss, imnaddfa u mqattgħa
  • 2 sinniet tewm, imqattgħin irqiq
  • 500g ikkapuljat tat-tiġieġ
  • 1½ mgħaref klin frisk (rosemary), imqatta’
  • 2 mgħaref tursin frisk, imqatta’, u ftit weraq biex iżżejjen
  • 55g mozzarella, maħkuka oħxon
  • Ħaxix imħallat għal insalata, biex isservi

Għall-bexamella:

  • 60g butir
  • 75g dqiq
  • 750ml ħalib
  • 25g ġobon Parmiġġan, maħkuk
  • Niskata noċemuskata (nutmeg) mitħuna
  • Melħ u bżar mitħun frisk

Metodu:

  1. Idlek landa tal-ħobż (loaf tin) ta’ 11ċm x 21ċm biż-żejt u iksiha bil-kartaforn. F’kazzola kbira għalli l-istokk tat-tiġieġ fuq nar moderat. Ferra’ bil-mod il-polenta filwaqt li tħawwad il-ħin kollu.
  2. Baxxi n-nar u kompli ħawwad għal 4 minuti jew sakemm tagħqad it-taħlita. Żid nofs il-Parmiġġan u ħawwad. Ferra’ t-taħlita fil-landa u llixxa l-wiċċ. Meta tiksaħ, għattiha u kessaħha fil-friġġ għal 4 sigħat jew tul il-lejl.
  3. Saħħan mgħarfa żejt taż-żebbuġa f’taġen fuq nar għoli. Żid il-bacon u l-kurrat u qalli għal 2 minuti jew sakemm il-kurrat jibda jirtab. Żid it-tewm u kompli qalli għal minuta oħra. Żid l-ikkapuljat tat-tiġieġ u ħawwad b’mgħarfa tal-injam biex tkisser l-ikkapuljat. Sajjar għal 5 minuti jew sakemm it-tiġieġ ikun sar. Żid il-klin u t-tursin u ħawwad.
  4. Biex tagħmel il-bexamella: dewweb il-butir f’kazzola fuq nar medju sakemm jibda jbaqbaq. Żid id-dqiq u ħawwad għal 2 minuti. Neħħi l-kazzola minn fuq in-nar u żid il-ħalib bil-mod filwaqt li tħabbat kontinwament sakemm it-taħlita ta’ dqiq u butir tkun inħallet kollha. Poġġi l-kazzola fuq in-nar u ħawwad kontinwament għal madwar 4 minuti jew sakemm it-taħlita tibda tagħqad. Neħħi minn fuq in-nar u żid il-Parmiġġan, in-noċemuskata, melħ u bżar. Ħallat nofs il-bexamella mat-taħlta tat-tiġieġ.
  5. Saħħan il-forn għal temperatura ta’ 180°C. Qatta’ l-polenta fi 12-il biċċa ndaqs. Idlek 6 dixxijiet individwali (375ml) biż-żejt. Poġġi biċċa mill-polenta fil-qiegħ ta’ kull dixx. Qassam nofs it-taħlita tat-tiġieġ bejn is-sitt dixxijiet u erġa’ poġġi l-biċċiet tal-polenta li fadal fuq kull wieħed. Qassam il-kumplament tat-taħlita tat-tiġieġ, kif ukoll il-kumplament tal-bexamella. Roxx l-uċuħ bil-mozzarella u l-kumplament tal-Parmiġġan.
  6. Aħmi għal 20-25 minuta jew sakemm jiħmar il-wiċċ u tinħall il-mozzarella. Żejjen bi ftit weraq tat-tursin u servi ma’ insalata.

 
Ippruvajt din ir-riċetta?  Kif sibtha? Għidilna billi tħalli kumment jew ir-rating hawn taħt u agħfas share.