Riċetta: Kustilji tal-majjal bit-tuffieħ u l-kannella

Riċetta Kustilji tal-majjal bit-tuffieħ u l-kannella

Il-laħam tal-majjal u t-tuffieħ huma żewġ ingredjenti li jmorru perfettament ma’ xulxin. Żid magħhom ftit ħwawar u ġewż u jkollok ikla b’togħma eċċellenti, bid-differenza bejn l-irtubija tat-tuffieħ u t-tqarmiċa tal-ġewż li tispikka fuq kollox.

Ingredjenti

Għal 4 persuni

  • 4 porzjonijiet kustilji tal-majjal (jistgħu ikunu mingħajr għadma)
  • 2 mgħaref butir
  • 3 mgħaref zokkor ismar
  • 1 kuċċarina trab tal-kannella
  • 1/4 kuċċarina noċemuskata mitħuna
  • 1 niskata melħ
  • 4 tuffiħat, imqattgħin flieli rqaq
  • 2 mgħaref ġewż imfarrak

F’taġen kbir holl mgħarfa mill-butir fuq nar medju. Żid il-kustilji tal-majjal u sajjar għal 4-5 minuti. Dawwarhom fuq il-wiċċ l-ieħor u kompli sajjarhom għal 4-5 minuti oħra.

Sadanittant f’ bieqja żgħira ħallat iż-żokkor, it-trab tal-kannella, in-noċemuskata u l-melħ.

Neħħi l-kustilji mit -taġen u żommhom għas-sħana. Fit-taġen itfa’ t-tuffieħ, il-ġewż,  it-taħlita taz-zokkor u l-kumplament tal-butir. Sajjar bil-mod sakemm jirtab it-tuffieħ filwaqt li tħawwad sikwit. Servi mal-kustilji.