Għall-ikla tal-Għid ħafna huma dawk li hija tradizzjoni għalihom li jsajru l-ħaruf. Din hija riċetta faċli ferm biex tipprepara u ssajjar għalkemm għandha bżonn ftit ħin għall-immarinar, li jista’ wkoll isir minn ġurnata qabel.
Preparazzjoni: 15-il minuta
Ħin totali: 45 minuta, u ħin għall-immarinar
Isservi: 4 persuni
Ingredjenti:
- 1.2 kg kustilji tal-ħaruf sħaħ (rack)
- Żewġ ponnijiet weraq tal-ħabaq frisk
- Ponn weraq tari tal-ispinaċi
- 4 sinniet tewm
- 2 imgħaref pistaċċ inkaljat
- 200 ml żejt taż-żebbuġa, u mgħarfa oħra
- Melħ u bżar mitħun frisk
Tħejjija:
- Roxx il-kustilji bil-melħ u l-bżar.
- Poġġi l-ħabaq, l-ispinaċi, il-pistaċċ, it-tewm u 200 ml żejt taż-żebbuġa flimkien ma’ ftit melħ u bżar fi blender u kissirhom sakemm ikollok paste.
- Saħħan mgħarfa żejt f’taġen kbir u xawwat il-kustilji minn kull naħa sakemm jieħdu l-kulur.
- Poġġihom f’dixx u, kif jibirdu biżżejjed, idlikhom kompletament bil-paste.
- Għatti d-dixx b’biċċa foil u daħħal il-kustilji fil-friġġ biex jimmarinaw għal mill-inqas sagħtejn.
- Saħħan il-forn għal temperatura ta’ 200°C. Meta toħroġ il-kustilji mill-friġġ ħallihom għal 30 minuta f’temperatura tal-kamra, imbagħad daħħalhom mgħottijin fil-forn imsaħħan għal 25-30 minuta jekk trid li jibqgħu ftit ħamranin minn ġewwa. Żid it-tul ta’ ħin fil-forn jekk tridhom imsajrin aktar.
- Ħalli l-kustiji joqogħdu għal 10 minuti qabel tqattagħhom u sservihom.
Ippruvajtha din ir-ricetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.
Would you like to read this recipe in English? Let us know in the comments section below!
