Riċetta: Krema tal-lumi

Lemon cream

Din id-deżerta hija ħafifa biex tipprepara u tista’ tippreparaha minn kmieni. Bit-togħma friska ta’ lumi  tinżel tajjeb wara xi ikla tajba.

Ħin: 30 minuta, u ħin biex tkessaħ

Isservi: 4 persuni

Ingredjenti:

  • 6 mgħaref meraq tal-lumi frisk
  • 4 mgħaref qxur tal-lumi, maħkuk
  • 150 g zokkor
  • 4 mgħaref dqiq tal-qamħirrun (corn flour)
  • 2 mgħaref butir, imdewweb
  • 2 isfra tal- bajd, imħabbtin ħafif
  • 500 ml ħalib
  • Niskata melħ

Tħejjija:

  1. F’kazzola ħallat flimkien iz-zokkor u d-dqiq tal-qamħirrun. Żid il-ħalib ftit ftit u kompli ħabbat sakemm ikollok taħlita lixxa mingħajr boċċi.  Żid l-isfra tal-bajd, il-melħ u l-qxur tal-lumi u ħabbat kollox sew flimkien.
  2. Poġġi l-kazzola fuq nar moderat u ħawwad (l-aħjar li tuża ħabbata tal-bajd) kontinwament sakemm it-taħlita tibda tagħqad. Neħħi l-kazzola minn fuq in-nar u żid il-butir u l-meraq tal-lumi. Jekk tara li hemm il-bżonn għaddi l-krema minn passatur.
  3. Ferra’ l-krema fi skutelli żgħar jew reċipjenti oħra adattati u ħallihom jibirdu, imbagħad daħħalhom fil-friġġ għal mill-inqas sagħtejn sakemm joqogħdu u jiksħu.
  4. Servi l-krema tal-lumi mżejna bi krema mħabbta, flieli tal-lumi jew weraq tan-nagħniegħ frisk.

Ippruvajtha din ir-ricetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar riċetti li jgħoġbuk.