Min iħobb iċ-ċikkulata fis-sajf normalment jaqleb u jieħu l-ġelat bit-togħma taċ-ċikkulata. Għalhekk din ir-riċetta ta’ krema b’żewġ kwalitajiet taċ-ċikkulata żgur għandha tinżel tajjeb ma’ ħafna.
Ħin: siegħa, u ħin biex tkessaħ
Isservi: 4 persuni
Ingredjenti:
- 350 ml krema doppja, kiesħa
- 100 g cikkulata skura, imkissra
- 100 g ċikkulata bajda, imkissra
- 2 mgħaref ilma kiesaħ
- Kuċċarina ġelatina
- 2 isfra tal-bajd
- 2 mgħaref zokkor fin (caster sugar)
- 125 ml ħalib
- Wafer, biex isservi
Tħejjija:
- Ħabbat il-krema doppja sakemm titla’ u tagħqad, għatiha u poġġiha fil-friġġ għal aktar tard.
- Poġġi l-ilma fi skutella u roxx il-ġelatina fuqu. Ħalliha toqgħod sakemm tiġi qiaha sponża, imbagħad ħollha banjumarija.
- Poġġi ż-żewġ kwalitajiet ta’ cikkulata fi skutelli differenti u ħoll kull waħda banjumarija.
- Fi skutella mdaqqsa ħabbat flimkien iz-zokkor u l-bajd sakemm it-taħlita tiċċara u ssir kremuża.
- Saħħan il-ħalib bil-mod f’kazzola żgħira u ferra’ nofsu bil-mod mat-taħlita tal-bajd u z-zokkor filwaqt li tħabbat kontinwament. Ferra’ din it-taħlita lura fil-kazzola mal-kumplament tal-ħalib u kompli ħabbat fuq nar baxx sakemm it-taħlita teħxien li teħel mal-wara ta’ mgħarfa.
- Neħħi l-kazzola minn fuq in-nar u żid il-ġelatina filwaqt li tkompli tħabbat.
- Aqsam it-taħlita bejn iż-żewġ skutelli biċ-ċikkulata u ħawwad kull waħda sew. Ħallihom jibirdu.
- Aqsam il-krema mħabbta bejn iż-żewġ skutelli biċ-ċikkulata skura u bajda. Daħħalha bil-mod f’kull waħda (fold in).
- Aqsam il-krema taċ-ċikkulata skura bejn erba’ tazzi u ffriża għal 15-20 minuta. Ferra’ l-krema taċ-ċikkulata bajda bejn l-erba’ tazzi fuq l-iskura. Għatti kull tazza bil-cling film u ħallihom jiksħu fil-friġġ.
- Servi l-krema kiesħa bil-wafer imfarrka fil-wiċċ.
