Riċetta: Klamari bil-panura tal-birra u zalza tartar

Calamari rings in beer batter

Għalkemm fihom ftit xogħol u taqla’ l-kċina biex tagħmilhom, dawn il-klamari fil-panura tal-birra maz-zalza tartar jiġu tajbin ħafna.

Ħin: siegħa u 30 minuta

Isservi: 4-6 persuni

Ingredjenti:

Għall-klamari:

  • 4 klamari kbar jew 6 iżgħar, madwar 900 g b’kollox
  •  300 g dqiq
  • 2 imgħaref żejt taż-żebbuġa
  • Niskata  melħ
  • ½ kuċċarina bżar cayenne
  • 300 ml birra kiesħa
  • Flieli tal-lumi

Għaz-zalza tartar:

  • 200 ml yoghurt naturali
  • Mgħarfa kappar, imqatta’ rqiq
  • 2 gherkins żgħar, imqattgħin irqiq
  • 2 imgħaref tursin frisk, imqatta’ rqiq

Tħejjija:

  1. Fi skutella kbira ħallat flimkien nofs id-dqiq, il-melħ u l-bżar cayenne.
  2. Żid iż-żejt taż-żebbuġa u ibda ferra’ l-birra bil-mod filwaqt li tħabbat sakemm ikollok taħlita lixxa. Għatti l-iskutella u qiegħda fil-friġġ għal 30 minuta.
  3. Sadanittant, poġġi kazzola bl-ilma fuq in-nar biex tagħli.
  4. Naddaf u aħsel sew il-klamari. Qattagħhom roti ta’ 1.5 ċm u t-tentakoli aqsamhom fi tnejn jew erba’ biċċiet, skont id-daqs tagħhom.
  5. Niżżel il-klamari fl-ilma jagħli, ħallihom għal ftit sekondi biex jieħdu l-forma ta’ ċirku u saffihom. Ħallihom joqtru sew f’passatur.
  6. Biex tipprepara z-zalza tartar, poġġi l-ingredjenti kollha fi skutella u ħawwadhom sew flimkien; għatti l-iskutella u poġġiha fil-friġġ.
  7. Saħħan iż-żejt f’kazzola fonda (iż-żejt irid ikun jasal biss sa nofsha).
  8. Sadanittant poġġi l-kumplament tad-dqiq fi platt fond u dawwar il-biċċiet tal-klamari fih sakemm jinksew bid-dqiq. Farfar iż-żejjed u niżżel il-klamari ftit ftit fit-taħlita tal-birra. Ħalli ż-żejjed joqtor u niżżilhom fiż-żejt b’attenzjoni. Importanti li tagħmel dan ftit ftit għax inkella jeħlu kollha ma’ xulxin.
  9. Aqli sakemm jiħmaru u tellagħhom b’mgħarfa mtaqqba għal fuq platt miksi bil-kartaforn biex joqtru. Bejn kull tefgħa u oħra iġbor bl-imgħarfa wkoll il-frak li jibqa’ fiż-żejt biex ma jinħaraqx.
  10.  Servi l-klamari fil-pront mal-flieli tal-lumi u z-zalza tartar. 

Ippruvajtha din ir-riċetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar riċetti li jgħoġbuk.

Would you like to read this recipe in English? Let us know in the comments section below!