Bix-xemx li għandna hawn Malta, it-tadam imqadded misjur fix-xemx huwa tradizzjonali f'pajjiżna. Iżda hemm min jagħmlu mielaħ ħafna, jew inixxfu wisq, u mhux dejjem issib it-tadam imqadded skont il-gosti tiegħek. Tajjeb tkun taf kif tista' tagħmlu inti, kemm fix-xemx kif ukoll bil-metodu tal-forn, biex tagħmel it-tadam skont il-gosti tiegħek jew skont il-bżonnijiet tar-riċetta li qiegħed tħejji.
Ingredjenti:
- 18-il tadama żengulija
- Melħ oħxon tal-baħar
- 6 sinniet tewm, mgħaffġin bi ftit melħ
- 8 imgħaref origanu mqatta'
- Bżar iswed mitħun
- Żejt taż-żebbuġa
Tħejjija:
- Saħħan il-forn fuq temperatura baxxa ħafna, madwar 100 °C.
- Aqsam it-tadam min-nofs għall-wisa', u neħħi ż-żerriegħa.
- Mellaħ il-ġewwieni tat-tadam u poġġihom wiċċhom 'l isfel fuq tilar tal-wire, ħallihom joqogħdu għal madwar nofs siegħa, imbagħad laħlaħ sew u nixxef.
- Poġġi t-tadam fuq tilar bil-parti l-mikxufa tħares 'il fuq.
- Ħallat it-tewm mal-origanu u l-bżar iswed, u raxxax it-taħlita fuq il-parti l-mikxufa tat-tadam. Ferragħ ħarira żejt taż-żebbuġa fuqu.
- Sajjar fil-forn għal madwar 3 sigħat jew ħalli fix-xemx għal jumejn (daħħalhom matul il-lejl), jew skont il-gosti.
- Poġġi t-tadam ġo vażett sterilizzat u iksih biż-żejt taż-żebbuġa.
Għoġbitek din ir-riċetta? Ħalli l-kummenti tiegħek hawn taħt.
