Meta jkun l-istaġun tiegħu, kulħadd jieħu pjaċir igawdi t-togħmiet ħelwin tal-frott frisk. Din ir-riċetta għal kejk tan-nuċiprisk tagħtina idea tajba wkoll biex nerfgħu il-frott fil-friża u nużawh barra mill-istaġun billi ndaħħluh fil-ħelu, bħal ġo xi kejk misjur fil-forn.
Preparazzjoni: 30 minuta
Ħin totali: Siegħa u 45 minuta
Isservi: 8-10 porzjonijiet
Ingredjenti:
- 10 imgħaref butir mhux mielaħ Kerrygold, fit-temperatura tal-kamra
- 1/2 kikkra zokkor ismar
- 4 kikkri nuċiprisk (frisk jew friżat) mqatta' biċċiet
- Kikkra u nofs dqiq
- Kuċċarina u nofs baking powder
- Nofs kuċċarina baking soda
- Nofs kuċċarina melħ oħxon
- 3/4 kikkra zokkor
- 2 bajdiet kbar
- Kuċċarina estratt tal-vanilja
- 1/2 kikkra jogurt plain
Tħejjija:
- Saħħan il-forn għal 160 C.
- Poġġi 4 imgħaref butir ġo dixx tal-kejkijiet ta' 22cm u li hu fond 5ċm, u dewweb fil-forn.
- Neħħi d-dixx mil-forn u raxxax iz-zokkor ismar fuq il-butir.
- Nixxef in-nuċiprisk kemm tista' bil-karta tal-kċina u poġġi l-frott fid-dixx ħdejn xulxin iżda mhux fuq xulxin.
- Ħawwad flimkien id-dqiq, il-baking powder, il-baking soda u l-melħ ġo skutella medja.
- Uża mixer fuq veloċità għolja biex tħabbat 6 imgħaref butir sakemm isir ħafif u artab. Żid iz-zokkor u ħawwad sew, imbgħad żid il-bajdiet, waħda waħda. (Jista' jkun li jkollok bżonn tniżżel l-ingredjenti minn mal-ġenb tal-iskutella biex kollox ikompli jitħawwadd sew.) Żid il-vanilja.
- Naqqas il-veloċità tal-mixer u ħawwad id-dqiq mat-taħlita fi tlett fażijiet, u żid ftit jogurt bejn kull fażi ta' dqiq. Ħawwad sew sakemm kollox isir uniformi.
- Ifrex it-taħlita fuq in-nuċiprisk.
- Sajjar fil-forn għal madwar siegħa u għaxar minuti, sakemm il-kejk jismar. Biex tara sarx, daħħal stikkadenti ġol-kejk u ara li toħroġ nadifa.
- Ħalli l-kejk jibred għal madwar 15-il minuta.
- Dawwar sikkina max-xifer bejn il-kejk u d-dixx u aqleb il-kejk fuq platt. Servi sħun jew fit-temperatura tal-kamra.