Read this in English: Recipe: Tea and fruit cake
Kejk li huwa perfett għall-kolazzjon għax, apparti li tista’ tieklu kif inhu, tista’ tixwih u tidilku bil-butir jew marmalade... u żgur jinżel għasel ma’ kikkra te jew kafè.
Ħin: siegħa u nofs, u lejl biex ixxarrab il-frott
Isservi: 12-il persuna
Ingredjenti:
- 500 g frott imħallat: żbib, sultana u passolina
- 500 g dqiq self-raising
- Bajda
- 250 g zokkor ismar
- 375 ml te kiesaħ
- ½ kuċċarina ħwawar imħallta (mixed spice)
- ½ kuċċarina trab tal-kannella (cinnamon)
Tħejjija:
- Poġġi l-frott u z-zokkor fi skutella kbira u ferra’ fuqhom it-te. Ħawwad sew, għatti l-iskutella u ħalli l-frott jixxarab tul il-lejl.
- Saħħan il-forn għal temperatura ta’ 180°C. Idlek u iksi bil-kartaforn il-qiegħ ta’ landa tal-ħobż ta’ kilo.
- Ħabbat ħafif il-bajda u żidha mal-frott. Għarbel id-dqiq fuq il-frott flimkien mat-trab tal-kannella u l-ħwawar imħallta u ħawwad kollox flimkien.
- Aqleb it-taħlita fil-landa ppreparata u aħmi għal bejn siegħa jew siegħa u kwart, sakemm stikka li ddaħħal f-nofs il-kejk toħroġ nadifa.
- Ħalli l-kejk jibred fil-landa għal 20 minuta, imbagħad oħorġu u ħallih ikompli jibred fuq gradilja.
Ippruvajtha din ir-riċetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar riċetti li jgħoġbuk.