Riċetta: Kejk tal-friġġ biż-żbib, ġellewż u pistaċċ

cake-with-raisins-nuts-

Jekk tiddejjaq tixgħel il-forn biex tagħmel kejk, speċjalment fil-ġranet sħan, imma xorta tixtieq tagħmel xi ħaġa ħelwa, dan il-kejk isolvilek il-problema għax minflok fil-forn iddaħħlu fil-friġġ!

Ħin: sagħtejn u 45 minuta

Isservi: 10-12-il persuna

Ingredjenti:

  • 200 g gallettini taċ-ċikkulata, imkissrin f’biċċiet ta’ madwar 1 ċm
  • 75 g pistaċċ mingħajr qoxra, inkaljat ħafif
  • 75 g ġellewż mingħajr qoxra, inkaljat ħafif
  • 75 g żbib, imqatta’
  • 300 g ċikkulata skura jew tal-ħalib, imkissra
  • 50 g butir
  • 200 ml ħalib magħqud (condensed milk)
  • Mgħarfa brandy
  • Kawkaw (cocoa), biex tgħarbel

Tħejjija:

  1. Idlek landa tal-ħobż (loaf tin) ta’ 20 ċm x 9 ċm bi ftit butir. Iksi l-qiegħ u l-ġnub bil-kartaforn.
  2. Ħallat flimkien il-gallettini, iż-żbib, il-ġellewż u l-pistaċċ.
  3. Poġġi l-ħalib magħqud, iċ-ċikkulata u l-butir f’kazzola fuq nar baxx u ħawwad sakemm jinħallu u jkollok taħlita lixxa. Fl-aħħar ftit żid ukoll il-brandy.
  4. Żid it-taħlita tal-gallettini fil-kazzola u ħawwad sakemm jitħallat kollox.
  5. Aqleb it-taħlita fil-landa ppreparata u llixxa l-wiċċ.
  6. Għatti l-landa bil-cling film u poġġiha fil-friġġ għal 3 sigħat jew sakemm tara li għaqdet kompletament.
  7. Aqleb il-kejk għal fuq platt u aqla’ l-kartaforn. Għarbel il-wiċċ tal-kejk bil-kawkaw, qattgħu u servih.

Ippruvajtha din ir-riċetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar riċetti li jgħoġbuk.

Would you like to read this recipe in English? Let us know in the comments section below!