Riċetta: Kejk tal-banana u ġewż pekan

Banana and pecan cake Kejk tal-banana u ġewż pekan

See this recipe in English: Banana and pecan cake

Għal mat-te jew kafè ta’ waranofsinhar agħmel dan il-kejk bil-banana misjura wisq li għandek fil-fruttiera!

Preparazzjoni: 30 minuta

Ħin totali: Siegħa u 45 minuta

Isservi: 12-il persuna

Ingredjenti:

  • 100 g butir, temperatura tal-kamra
  • 140 g zokkor ismar
  • 2 bajdiet
  • 3 bananiet kbar misjurin, mgħaffġin
  • 50 g ġewż pekan (pecan nuts)
  • 50g żbib
  • 50 ml ħalib
  • 100 ml jogurt naturali
  • 280 g dqiq
  • 1 kuċċarina bicarbonat tas-sodju (bicarbonate of soda)

Tħejjija:

  1. Saħħan il-forn għal temperatura ta’ 160°C. Idlek landa (loaf tin) ta’ 20 ċm x 13 ċm bil-butir u iksi l-qiegħ bil-kartaforn.
  2. F’bieqja kbira ħabbat flimkien, b’ħabbata tal-elettriku, iz-zokkor u l-butir sakemm ikollok taħlita ħafifa u kremuża.
  3. Żid il-bajd waħda waħda filwaqt li tkompli tħabbat.
  4. Żid il-banana, il-ġewż pekan, iż-żbib, il-ħalib u l-jogurt u ħawwad b’mgħarfa sew.
  5. Għarbel id-dqiq u l-bikarbonat tas-sodju fuq it-taħlita tal-banana u daħħalhom bil-mod fit-taħlita mingħajr ma tħawwad iżżejjed. Ferra’ t-taħlita fil-landa ppreparata u llixxa l-wiċċ.
  6. Aħmi għal siegħa u 15-il minuta jew sakemm stikka li ddaħħal fin-nofs tal-kejk toħroġ nadifa.
  7. Ħalli l-kejk jibred fil-landa għal 10 minuti, imbagħad oħorġu fuq gradilja biex jibred.

Ippruvajtha din ir-riċetta? Għoġbitek? Ħalli kumment u r-rating tiegħek hawn taħt u agħfas share biex inkomplu nwasslulek iktar riċetti bħal din.