Riċetta: Kejk taċ-ċikkulata u l-pitravi

Chocolate and beet cake Kejk taċ-ċikkulata u l-pitravi

Read this recipe in English: Chocolate and beet cake

Kejk taċ-ċikkulata b’differenza: minflok kejk bil-karrotti maħkukin, din id-darba se nagħmlu kejk bil-pitravi maħkukin. Il-kulur joħroġ verament sabiħ; bħal red velvet skur ħafna, imma minflok kulur artifiċjali għandek il-pitravi li mhux kulur biss jagħtu lil dan il-kejk imma anke ħlewwa naturali u morbidezza.

Preparazzjoni: 20 minuta

Ħin totali: siehħa u 20 minuta

Isservi: 10-12-il persuna

Ingredjenti:

  • 250 g ċikkula skura, maqsuma
  • 3 bajdiet kbar
  • 200 g zokkor muscavado
  • 100 ml żejt tal-ward tax-xemx (sunflower oil)
  • ½ kuċċarina essenza tal-vanilla
  • 100 g dqiq self-raising
  • ½ kuċċarina bikarbonat tas-sodju (bicarbonate of soda)
  • ½ kuċċarina trab tal-ħami (baking powder)
  • 50 g lewż pur mitħun
  • 250 g pitravi

Għall-ġelu:

  • 150 g ċikkulata skura, maqsuma
  • 100g zokkor tal-ġelu (icing sugar)
  • 100g krema doppja

Tħejjija:

  1. Saħħan il-forn għal tempertura ta’ 180°C. Idlek landa ta’ 22 ċm bi ftit butir u iksi l-qiegħ bil-kartaforn.
  2. Qaxxar u ħakkek il-pitravi, poġġih f’passatur fuq skutella, agħsarlu l-meraq u ħallih joqtor.
  3. Poġġi ċ-ċikkulata fi skutella fuq kazzola bil-misħun (banjumarija). Ħawwad iċ-ċikkulata sakemm tinħall kollha u neħħiha minn fuq in-nar.
  4. Poġġi l-bajd, iz-zokkor u ż-żejt ġo skutella u ħabbat sew flimkien b’ħabbata tal-elettriku għal 3 minuti sakemm it-taħlita tiġi lixxa u kremuża.
  5. Żid magħha l-essenza tal-vanilla, imbagħad għarbel fuqha d-dqiq, il-bikarbonat tas-sodju u t-trab tal-ħami. Daħħalhom bil-mod fit-taħlita; bl-istess mod daħħal ukoll il-lewż mitħun, imbagħad iċ-ċikkulata u l-pitravi.
  6. Ferra’ t-taħlita fil-landa ppreparata u aħmi għal 50-60 minuta, jew sakemm stikka mdaħħla f’nofs il-kejk toħroġ xotta. Jekk tara li l-kejk qed isir malajr wisq minn barra għatti l-landa bil-foil. Ħalli l-kejk jibred fil-landa stess għal 10 minuti, imbagħad oħorġu fuq gradilja biex jibred sew.
  7. Biex tagħmel il-ġelu, poġġi ċ-ċikkulata ġo skutella fuq kazzola bil-misħun (banjumarija) u ħawwad iċ-ċikkulata sakemm tinħall kollha. Neħħiha minn fuq il-kazzola u ħalliha tibred. Żid il-krema u ż-żokkor tal-ġelu u ħabbat biex ikollok krema li tiddellek. Ifrixha mal-wiċċ u l-ġnub tal-kejk u servi.

Ippruvajtha din ir-riċetta? Għoġbitek? Għidilna billi tħalli kumment u r-rating tiegħek hawn taħt u agħfas share.