Riċetta: Kejk maqlub tal-lanġas u lewż

Pear and nut upside down cake

Dan il-kejk huwa ddekorat minnu nnifsu peress li meta taqilbu ta’ taħt fuq joħroġ l-effett tal-lanġas ikkaramelizzat biz-zokkor li tkun poġġejt fil-qiegħ tal-landa. Apparti d-disinn, il-lanġas jagħmel lil dan il-kejk verament morbidu. Jekk ikollna lanġas kemxejn misjur nistgħu nutilizzawh f’dan il-kejk minflok narmuh.

Ħin totali: sagħtejn

Isservi: 6 porzjonijiet

Ingredjenti:

  • 180 g zokkor ismar
  • 270 g butir, f’temperatura tal-kamra
  • 4 lanġasiet misjurin, imqaxxrin, biż-żerriegħa mneħħija, u mqattgħin flieli ta’ 2 ċm ħxuna
  • 300 g zokkor fin (caster sugar)
  • 3 bajdiet
  • 250 g dqiq
  • 1½ kuċċarina trab tal-ħami (baking powder)
  • Kuċċarina trab tal-kannella
  • ½ kuċċarina noċemuskata, maħkuka
  • 80 g lewż mitħun
  • 200 ml jogurt naturali
  • 50 ml ħalib
  • Krema mħabbta, biex isservi

Tħejjija:

  1. Saħħan il-forn għal temperatura ta’ 180°C. Idlek u iksi bil-kartaforn landa ta’ 26 ċm.
  2. Ifrex iz-zokkor ismar fil-qiegħ tal-landa. Ippostja l-flieli tal-lanġas, waħda tirkeb fuq l-oħra forma ta’ ċirku, fuq iz-zokkor.
  3. Poġġi l-butir u z-zokkor fin fi skutella u ħabbat, b’ħabbata tal-elettriku, għal 5 minuti jew sakemm it-taħlita teħfif. Żid il-bajd waħda waħda.
  4. Għarbel flimkien id-dqiq, it-trab tal-ħami u l-ħwawar. Żid magħhom l-intrita, imbagħad daħħalhom ftit ftit billi titwihom fit-taħlita taz-zokkor, butir u bajd (fold-in).
  5. Ħallat il-jogurt mal-ħalib u żidhom mat-taħlita tal-kejk. Ferra’ t-taħlita fuq il-lanġas.
  6. Poġġi l-landa fuq tilar u aħmi għal siegħa u 20 minuta, jew sakemm jagħqad u stikka toħroġ nadifa meta ddaħħalha fin-nofs tal-kejk. Jekk tara li l-kejk qed jinħataf minn barra, għatti l-wiċċ b’biċċa foil.
  7. Ħalli l-kejk jibred fil-landa għal 30 minuta. Dawwar sikkina bejn il-landa u l-kejk, imbagħad aqilbu bil-mod għal fuq platt. Servi bil-krema mħabbta.

Ippruvajtha din ir-ricetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.

Would you like to read this recipe in English? Let us know in the comments section below!