Riċetta: Kejk biċ-ċikkulata u ġewż karamelizzat

Chocolate and caramelised nuts cake

Kejk irreżistibbli b’żewġ taħlitiet - tal-vanilla u taċ-ċikkulata - flimkien, b’kisja ta’ ġelu artab taċ-ċikkulata u ġewz ikkaramelizzat u jqarmeċ fil-wiċċ – kumbinazzjoni li żgur tħallik tilgħaq subgħajk!

Ħin totali: siegħa u 35 minuta

Isservi: 8 porzjonijiet

Ingredjenti:

  • 200 g jogurt Grieg
  • 6 bajdiet
  • 350 g zokkor
  • 230 g dqiq
  • Mgħarfa trab tal-ħami (baking powder)
  • 150 ml żejt tal-ward tax-xemx (sunflower oil)
  • ½ kuċċarina essenza tal-vanilla
  • 2 imgħaref kokotina (cocoa powder)

Għall-ġewż karamelizzat:

  • 50 g ġewż imqaxxar
  • 100 g zokkor

Għall-ġelu taċ-ċikkulata:

  • 200 g ċikkulata skura, imqattgħa
  • 30 g butir

Tħejjija:

  1. Saħħan il-forn għal temperatura ta’ 190°C. Idlek sew bil-butir landa ta’ 23 ċm x 13 ċm (loaf tin) u roxxha bid-dqiq.
  2. B’ħabbata tal-elettriku ħabbat flimkien il-bajd u z-zokkor għal madwar 3 minuti, sakemm it-taħlita teħfif.
  3. Daħħal id-dqiq u t-trab tal-ħami bil-mod, imbagħad żid iż-żejt u l-jogurt.
  4. Tella’ terz mit-taħlita fi skutella, żid magħha l-kokotina u ħawwadha sew.
  5. Fit-taħlita l-bajda żid il-vanilla u ħawwad.
  6. Biex tgħaqqad il-kejk ibda billi tferra’ 1/3 tat-taħlita bajda fil-qiegħ tal-landa, imbagħad nofs it-taħlita taċ-ċikkulata għat-tul f’nofs il-landa. Ferra’ 1/3 ieħor bajda u l-aħħar nofs tat-taħlita taċ-ċikkulata. Fl-aħħar ferra’ l-aħħar 1/3 tat-taħlita l-bajda.
  7. Daħħal sikkina f’rokna tal-landa u dawwar mix-xellug għal-lemin tul il-landa kollha biex toħloq effet ta’ rħama (marble) fuq ġewwa tal-kejk.
  8. Aħmi għal 10 minuti, imbagħad baxxi t-temperatura għal 170°C u aħmi għal 45 minuta oħra, sakemm stikka mdaħħla f’nofs il-kejk toħroġ nadifa.
  9. Ħalli l-kejk jibred fil-landa għal 10 minuti, imbagħad oħorġu fuq gradilja biex jiksaħ.

 Il-ġewż karamelizzat

  1. Ħoll nofs iz-zokkor ma’ 2 imgħaref ilma ġo kazzola.
  2. Kif il-karamella tibda ssir lewn dehbi, żid il-kumplament taz-zokkor ftit ftit. Kompli ħawwad fuq nar baxx sakemm issir lewn id-deheb ċar.
  3. Żid il-ġewż u ħawwad biex jinkesa.
  4. Ferrex it-taħlita fuq biċċa kartaforn u ara li tbiegħed il-ġewż minn ma’ xulxin.

 Il-ġelu taċ-ċikkulata

  1. Ħoll il-butir u ċ-ċikkulata flimkien banjumarija sakemm jiġu taħlita lixxa.
  2. Idlek fuq il-kejk li jkun bired kompletament.
  3. Żejjen il-wiċċ bil-ġewż karamelizzat.

Ippruvajtha din ir-ricetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.

Would you like to read this recipe in English? Let us know in the comments section below!