Il-kannelloni mimlijin huma wieħed mill-aktar ikliet tal-forn favoriti mal-Maltin, flimkien mal-lażanja, imqarrun il-forn, u patata l-forn bil-laħam. Jista’ jkun li nhar ta’ Ħadd inħobbu nieklu ikel imsajjar fil-forn għax bqajna bid-drawwa tan-nanniet tagħhna li dak iż-żmien kienu jieħdu d-dixx bl-ikel għand il-furnar, u jista’ jkun ukoll li huwa aktar faċli ti tipprepara platt komplut f’dixx wieħed fil-forn.
Ingredjenti
Għal 4 persuni
Għaz-zalza
- 1 mgħarfa żejt taż-żebbuġa
- 3 sinniet tewm, misħuqin
- ¼ kuċċarina origanu
- ¼ kuċċarina timu (thyme)
- 400g polpa tat-tadam
- 2 mgħaref tursin frisk, imqatta’
- 1 niskata melħ
- Bżar mitħun frisk
Għall-kannelloni
- 16-il-tubu tal-għaġin
- 1 mgħarfa żejt taż-żebbuġa
- 1 basla mdaqqsa, imqattgħa rqiq
- 1 sinna tewm, misħuqa
- 300g spinaċi tal-friża, bil-friża mniżżla u magħsura mill-ilma
- 2 nofsijiet isdra tat-tiġieġ, imsajrin u mqattgħin
- 1 kikkra rkotta
- ½ kikkra ġobon Parmiġġan, maħkuk
- 1 kikkra mozzarella, maħkuka
Saħħan il-forn għal temperatura ta’ 180°C. Idlek dixx ta’ 23ċm x 33ċm bi ftit żejt.
Saħħan mgħarfa żejt taż-żebbuġa f’kazzola u żid it-tewm, imbagħad it-tadam, l-origanu, it-timu u t-tursin. Meta t-taħlita tibda tagħli żid il-melħ u bżar mitħun frisk u ħalliha ttektek għal 10 minuti.
F’taġen saħħan mgħarfa żejt taż-żebbuġa, żid il-basla u t-tewma u qalli bil-mod għal madwar 5 minuti. Neħħi minn fuq in-nar u itfa’ l-ispinaċi filwaqt li tħawwad b’mgħarfa tal-injam biex tiftagħha. Żid it-tiġieġa misjura, l-irkotta u l-ġobon Parmiġġan. Ħawwad kollox flimkien sew.
Ferra’ nofs iz-zalza fid-dixx li ppreparajt biex tiksi l-qigħ. Imla t-tubi tal-għaġin bit-taħlita tal-irkotta, tiġieġ u spinaċi. Poġġi t-tubi mimlijin ġod-dixx wieħed ħdejn l-ieħor u ferra’ n-nofs l-ieħor taz-zalza sakemm tgħatti kollox. Iksi d-dixx bil-foil u aħmi għal 40 minuta. Oħroġ id-dixx mill-forn, neħħi l-foil u roxx il-wiċċ tal-kannelloni bil-mozzarella. Erġa’ daħħal fil-forn għal 5-7 minuti oħra, sakemm tinħall il-mozarella.