Tradizzjonalment din l-insalata li tissejjaħ Waldorf tkun magħmula minn tuffieħ, karfus, żbib, ġewż u għeneb b’taħlita ta’ mayonnaise. F’din ir-riċetta l-mayonnaise huwa miżjud bil-jogurt u mħawwar bil-kari u l-kemmun, u t-taħlita tal-insalata fiha ammont ta’ ċikwejra jew indivja li jagħtu t-togħma morra f’dan il-platt. Din l-insalata ssir aktar interessanti meta żżidilha laħam tad-dundjan imsajjar li jkun fadal mill-ikla tal-Milied.
Ħin: 10 minuti
Ingredjenti
Għal 6 persuni
Għat-taħlita tal-wiċċ:
- 3 mgħaref mayonnaise
- ¼ kikkra jogurt naturali
- 1 kuċċarina trab tal-kari
- ½ kuċċarina żerriegħa tal-kemmun, inkaljata u mitħuna
- ½ kuċċarina għasel
- 2 mgħaref meraq tal-lumi
- Melħ
- 2 mgħaref żejt tal-ġewż jew taż-żerriegħa tal-għeneb (grapeseed), jew 1 mgħarfa minn kull wieħed
Għall-insalata:
- 2 kikkri laħam tad-dundjan imqatta’
- 1 tuffieħa ħadra, imqaxxra u mqattgħa dadi
- 1 ½ kikkra karfus mill-oħxon (ta’ barra), imqatta’
- ¼ kikkra żbib
- 1/3 kikkra ġewż imqatta’
- 2 kikkri ċikwejra (raddicchio) jew indivja, imqattgħa
Metodu
- Ħabbat flimkien il-mayonnaise, il-jogurt, it-trab tal-kari, il-kemmun, l-għasel, il-meraq tal-lumi, iż-żejt u l-melħ f’bieqja.
- F’bieqja kbira ħallat il-laħam tad-dundjan, it-tuffieħa, il-karfus, il-ġewż, u ċ-ċikwejra jew l-indivja. Ferra’ t-taħlita tal-jogurt fuq l-insalata, ħawwad u servi.