Riċetta: Insalata tar-ravanell (radish), karrotti u tonn taż-żejt

Tuna, radish and carrot salad

Insalata friska u appetituża li tista’ wkoll tiġi ppreparata biex teħodha miegħek ix-xogħol jew ħdejn il-baħar.

Ħin: 25 minuta

Isservi: 4 persuni

Ingredjenti:

  • 250 g ravanell
  • 250 g karrotti
  • Mgħarfa kappar, imlaħlaħ
  • Weraq tal-ħass ikkabuċjat
  • Meraq ta’ nofs lumija
  • Mgħarfa ħall tal-inbid abjad
  • Kuċċarina mustarda
  • 2 mgħaref żejt taż-żebbuġa
  • 150 g tonn taż-żejt, imsaffi
  • 2 mgħaref tursin frisk, imqatta’
  • Melħ u bżar mitħun frisk

 

Tħejjija:

  1. Qatta’ r-ravanell fi ċrieki jew flieli rqaq. Qatta’ l-karotti fi strixxi rqaq b’vegetable peeler. Imla skutella bl-ilma, żid kuċċarina melħ u ħawwad sakemm jinħall. Żid ir-ravanell u l-karotti u ħallihom fl-ilma għal 10 minuti.
  2. Sadanittant, ħabbat flimkien il-meraq tal-lumi, iż-żejt taż-żebbuġa, il-mustarda, u ftit melħ u bżar.
  3. Iksi l-qiegħ tal-platti li se sservi fihom bil-weraq tal-ħass.
  4. Saffi r-ravanell u l-karotti mill-ilma u erġa’ poġġihom fl-iskutella. Żid magħhom il-kappar u t-tonn taż-żejt . Ferra’ wkoll it-taħlita likwida u ħallat kollox.
  5. Qassam l-insalata fuq il-ħass u roxx bit-tursin frisk.

Ippruvajtha din ir-ricetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar riċetti li jgħoġbuk.